Shillong, Nailar 24: U Bah Wellbirth Rani, uwei na ki rangbah ba la pynkhreh ban mih aireng ha ka elekshon MLA-2023 na Mawphlang Constituency, ula bteng ban theh ia ki song jingiarap sha ki paidbah ka Constituency kum ka synniang ba kin pyndonkam ha kano kano ka kam ba ki trei.
Dang ha kine ki khyndiat sngi, u bah Wellbirth uba dei u President ba dang shu shongthait jong ka seng FKJGP, ula noh synniang haduh T. 50,000 sha ka skul Sengkhasi kaba don ha Phaniewlah, Langiong ba kan pyndonkam ha ka ban pynbit pynbiang ia ki jingdonkam jong ka skul bad ki Khynnah.
Dang shen ruh, une u Rangbah ula noh synniang haduh T. 50,000 sha ka Village Organisation jong ki Self help Group (SHG) ka Tyrsad ba kan pyndonkam ha kaban pynkhreh ia ka jingrakhe lyngkhuh snem ba shisnem.
Lah ban kdew hangne ba une u Nongialam barim ka FKJGP uba la pyniasoh ialade sha ka seng United Democratic Party (UDP) ban iakhun ia ka ticket jong kane ka seng riewlum pyrshah ia u MLA ba mynta u Bah Eugeneson Lyngdoh.
