Shillong, Nailar 26 : Ka Mawkhar Sports Club ka la neh ha ka kyrdan kaba ha trai duh jong ka miej ia khein point ha ka Shillong Premier Leauge wat hadien ba ka laioh ban pynliem kylla ia ka Malki da 2-0 kol kaba dei ruh ka jingjop kaba nyngkong ia ka kynhun naduh ba sdang jong katei ka lympung kaba long ha madan Third Ground Polo.
Ia kitei ki ar tylli ki kol jong ka Mawkhar la ioh ban thep da u Banehskhem Khongsdam ha ka minit kaba 57 bad kawei pat ka kol lyngba u Defender Pyngrope ha ka minit kaba 66 jong ka kylal miet hi.
Kane kadei ruh ka jingiakhun kaba nyngkong ba ka Mawkhar ka la ioh ban thep palat shi kol ha ka jingiakhun pyrshah ia kano kano ka kynhun ha katei ka lympung.
Shwa ka jingiakhun hynne ka sngi ka Malki ka don ha ka kyrdan kaba 11 da ki 7 point katba ka Mawkhar pat ka don da lai point. Hynrei hadien ka jingiakhun, ka Malki ka neh kumjuh da ki 7 point bad ka Mawkhar pat ka la kiew sha ka 6 point.
Haba phai sha ka jingiakhun watla baroh arliang ki ioh bun bha ki kabu ksiar ban thep kol hynrei ym shym la don satia ban ioh pynkhih jar bad kumta tad haduh ban da kut ka kylla step ka jingiakhun ka neh da mar 0-0 kol.
Dei tad ynda la poi ka kylla miet ba ka Mawkhar ka la ioh ban pynkhih jar lyngba ka bol kaba la khyrwit da u Khongsdam bad pynbud sa u Pyngrope tang hadien katto katne minit.
Ha kane ka sngi watla ka Malki ka iakhhun tyngeh hynrei tad haduh ban da kut ka por ialehkai kam shym la lah shuh ban pynphai bad kumta ka pynlong ia ka Mawkhar ban khur suk ia ki lai point kiba nyngkong eh ha katei ka lympung.
Ka jingialehkai la shai ka sngi Saitjain pat kan long hapdeng ka Ryntih SC kaba don mynta 14 point pyrshah ia ka Nangkiew Irat SC kaba don 13 point bad ha ka kyrdan kaba saw bad kaba san.
