Shillong, K’lyngkot 15 : U Myntri Rangbah ka Jylla Conrad K Sangma ha ka sngi Balang ula ong ba jingiakren jong ka wat kaba ar ban iapynbeit ia ki 6 tylli ki jaka ba dang sah ha ka jingiakajia hapdeng ka Assam bad Meghalaya, kan sa sdang biang noh shen.
“Ngi la dep rai ba ngin sa iakynduh hadien kine ki elekshon hynrei ki elekshon kila kut mynta bad kumta ngi la dei ban iakynduh noh shen” ong u Conrad haba iakren bad ki nongthoh khubor.
“Ha ka jingshisha, nga la iakren bad u Myntri Rangbah ka Assam Himanta Biswa Sawma hynnin ka sngi halor kiwei pat ki kam. Ngi la iakren ia katto katne ki bynta, ngi la pynpaw ruh ia kane ka mat ba iadei bad ka jingialang bad ula kyntu ia nga ban ai jingmut ia ka tarik ban iakynduh bad ngi kyrmen ban gin sa lah ban iakynduh noh shen” ula bynrap.
Halor ki jingkynnoh ba kyntur jaka bein ka Assam, u Conrad ula ong “Hooid ka jingsngew kiba bun ka long ba ngi dei ban shah ia ka jingwan ki kam pynroi na ki skhim ka Sorkar pdeng, kam pher kaei ka Jylla kaba pyntrei, ki paidbah kim dei ban mad ia ki jingeh hynrei lada don kino kino ki skhim kiba pyntrei, ka dei ban da don ka jingiasyllok bad ki Deputy Commissioner”.
“Ha ka jingshisha nga la shimkhia bha ia kane ka kam bad lada don kino kino ki jingeh kiba mih, mano mano ruh ki lah ban phone ia nga ha ka mobile phone bad kane ka jingiakren kan poi beit beit sha u Myntri Rangbah ka Assam. Ngi don ka jingiadei kaba iajan bha ban pynthikna ba ngim dei ban iohi ia kino kino ki jyrwit jyrwat lane ki jingjia ki ba sngewsih hadien habud bad ban pynduna ia ki jingiakynad ha kine ki jaka” ula bynrap.
