Nongpoh, K’lyngkot 08 : Ka seng HITO-Ri-Bhoi District, ha ka sngi Balang, kala leit ujor sha u Deputy Commissioner ka Ri-Bhoi District halor ka jingkynnoh ba ka don ka jinglum khajna bym hok ia ki kali ba shalan syiar sha Jylla, kaba kot haduh T.30,000 kawei ka kali.
Ka HITO hapoh ka jingialam u President samla Shaniah Nongrum, kala kynnoh ba ka kynhun kaba khrong ia kane ka khajna ka dei ka All Meghalaya Poultry Supplier and Retailers Association.
Haba kren bad ki nongthoh khubor, u samla Shaniah Nongrum ula pynpaw ia ka jingsngewkhia halor ka jingeh ba mad da ki nongshalan syiar shapoh ka Jylla bad ong ba kine ki briew ki hap ban siew ia ka dor kaba heh-kaba long haduh T.30,000 kawei ka kali.
Ula kynnoh ba ki briew kila bat ia ki kali kit syiar ha surok bah National Highway-06 bad ban khrong khajna beain ia kine ki kali.
Ha kajuh ka por, une u Nongialam ka HITO ula pynpaw ia ka jingsngewkhia halor ka jinglong laitlan ka jingwan shalan syiar shapoh ka Jylla khlem da don ka jingkhmih bniah ia ka koit ka khiah jong ki syiar da ka Tnad Veterinary.
Ula ong ba kane ka long kaba buh jingma shibun ia ki paidbah nongbam doh syiar lada kam don ka jingpeit bniah ia ka koit ka khiah ki syiar shuwa ban pynpoi sha kylleng ki jaka ka Jylla.
Ka HITO kala dawa mardor ia ki bor pyniaid district ba kin tehlakam ia ki nongkhrong khajna beain bad ruh ban buh noh ia ka khyrdop ka ban khmih bniah ia ka koit ka khiah ki syiar ba wan pynpoi nabar ka Jylla.
