Shillong, K’lyngkot 08 : U Myntri ka Tnad Bording Abu Taher Mondal ha ka sngi Balang ula pynpaw ba ka jinglong jingman ha ka bording elektrik hapoh ka Jylla ka dei kaba dang biang bha ia mynta bad kam don satia kano kano ka jingthmu ban pyntreikam ia ka jingpynlip bording.
“Hynrei, haba poi ka khep, ngin sa shim ia ka rai halor kata. Tangba ka jingthmu jong ngi ka long ban iohi ba ka samoi thoh eksam kan iaid beit iaid ryntih khlem ka jingpynlip bording” ula ong haba iakren bad ki lad pathai khubor.
Haba pynpaw ba ki jingtynjuh kin mih beit, u Myntri ula ong “Ha ka jinglehkmen snem thymmai phi iohi ia ka jingkiew kynsan ka jing pyndonkam bording ha man kitransformer bad hateng hateng ka long kaba eh ia ngi ban tip ba haduh katno ngin lah ban ai bun ka bording ha kum katei ka por”.
“Hynrei kumba nga la pynpaw kham mynshuwa, ngi don ha ka khep kaba shngain haba phai sha ka bording elektrik ha ka Jylla, ngim pat donkam ban iapynlip bording, kam don satia ka jingthmu kaba kum kata ia mynta bad ngi dang pynkhreh ban pynthikna baka samoi thoh eksam jong ki khynnah kan iaid beit khlem ka jingpynlip bording” ula kular.
Hynrei u Mondal ula ong ba ki don ki khep ba don ka jingot bording hynrei kane kala jia namar ki kam maramot bad ka jingpyntreikam iaka Revamped Distribution Sector Scheme (RDSS) hapoh ka Jylla.
