Shillong, Nailar 26 : Kum shi bynta ka jingrakhe ia ka jingdap 50 snem ka jingioh la ka jong ka jylla, ka Department of Khasi jong ka Shillong College, Shillong ha ka sngi Palei ki la pyllait paidbah ia ka kot ba ai kyrteng – “The Khasi States – A brief Historical Timeline 1771-2017” – kaba la thoh lang da u Bah John F Kharshiing bad u Dr. Dr. Bodhi S Ranee.
Dang ha u snem 2019 u Bah John Kharshiing u la pyllait ruh ia kawei ka kot kaba iadei bad ka Jaidbynriew Khasi kaba la ai kyrteng – “The Federation of Khasi States: History, Epistemology and Politics”.
Haba kren ha katei ka jingialang, u Principal jong ka College, u Bah E Kharkongor u la ong ba katei ka kot ka long kaba kordor haduh katta katta.
“Ka don lut ia baroh ki jingjia naduh u snem 1771 bad ka batai shai ruh ia ka history jong ka imlang sahlang,” u la ong da kaba kyntu ia ki samla pule ba kin pynleit jingmut ha katei ka kot ban pyniar ia ka jingtip jong ki haba iadei bad ka Jaidbynriew Khasi bad ka imlang sahlang jong ka naduh ka por mynnor.
Ha katei ka kot, la kdew ruh ia ka jingiaid lynti jong ki jylla Khasi lane kita ki Khasi States naduh kitei ki snem 1771- haduh 2017 ha kaba la kdew ruh ia ki jingjia la ka long naduh ki tarik haduh ki snem ba jia.
La ong ruh ba ka jingthmu ba kongsan na ka bynta ba pynmih ia katei ka kot ka long ban pynsuk ia ki nongpule khamtam ia ki nongialam jong ka Jaidbynriew bad ruh ba kan long kum ka song jingtip na ka bynta jong ki riewshemphang haba iadei bad katei ka bynta.
Na ka liang u Bah John haba kren ha ka jingialang u la ong ba katei ka long kum ka jingiathuh khana ryngkat ki jingshisha kiba da don ki sakhi sabut. “Naduh ba pynmih ia ka kot kaba nyngkong ngi la ioh ia ka jingai mynsiem bad ka jingpynshlur na ki riewshemphang, don ruh kiba kynthoh bad don ruh kiba pynshlur.,” u la ong.
Nalorkata, u ogn ruh ba katei ka kot kadei kaba donkam bha ban pyndonkam pat na ka bynta ban phai dien haba donkam na ka bynta kino kino ki jingtip bad khamtam eh na ka bynta ka lawei ban sa wan.
