Nongstoiñ, Nailar 25: U Deputy Commissioner ka West Khasi Hills u la pyntip ba ka Ministry of Health & Family Welfare hapoh ka National Tuberculosis Elimination Programme (NTEP), ka la thaw ïa ka “Community Support Initiative”, da kaba yn kynthup ïa kino kino ki briew, ki kynhun kum ki sengbhalang, seng saiñ pyrthei, ki syiem, ki myntri, ki nongïalam shnong, ki bank, cooperative society, ki company bad kiwei kiwei, kiba kloi bad mynjur ban ai jingiarap ïa ki nongpang TB.
U ong ba kane ka jingiarap kan leit sha kito ki nongpang kiba duna ka ioh ka kot la ka long ka bai dawai, ka bam tei met, ka bai test, kiba ym don ha kane ka programme, ka bai leit bai wan ha ka por ba pyndep ia ka jingsumar kaba long ym duna ia ka shi snem tam.
Ki nong ai jingiarap ki hap ban pynrung kyrteng ha ka NIKSHAY Mitra. Ula kyrpad ba kin ïa noh ïa ki jingiarap sha kane ka Campaign khnang ban lah ban rat dyngkhong ïa ka jingpang TB.
Kino kino kiba mynjur ban ai ïa ki jingiarap, ki lah ban pyntip ha u District Tuberculosis Officer, West Khasi Hills District Nongstoiñ, lyngba u Whatsapp number 8974604743 bad Email ID [email protected] ha lane shwa ka 31 tarik mynta u bnai Nailar 2022.
