Shillong, Nohprah 26 : Ka long ka jingsarong ia ka Jylla Meghalaya hadien ba uwei u Khynnah 14 snem na South West Khasi Hills District, ula ioh pdiang ia ka khusnam Pradhan Mantri Rashtriya Bal Puraskar namar ki kam shlur bad ka jinglen lade.
Une u Khynnah u kyrteng u Heprit Kisen Wanniang, uba la pyllait im ia saw ngut ki Khynnah na ka jingngam jyllop hapoh ka Wah Maweitksar, kaba don ha Mawlangwir, South West Khasi Hills District.
Kane ka jingjia kala jia ha ka 25 tarik Jymmang 2024 ha ka por kumba 10 baje mynstep. Ha kane ka sngi, ki 4 ngut ki Khynnah ba hapoh 12 snem, kata u Heprit Gidian Thongni ba 9 snem, I Naphisadona Thongni bad 11 nem,I Haphibansuk Thongni ba 10 snem bad I Carefully Thongni ba 12 snem, kila leit iajngi pynngad ha kane ka wah hynrei kynsan kynsan u heprit Kisen Wanniang uba dang saitjain, u la iohsngew ia ka jingpyrta bad jingpan jingiarap bad mar mar hi ula mareh bad ula kynthoh sha kane a wah bad ioh ban pyllait im ia laingut na ki.
Ki briew ba don marjan ruh kila iamareh ban iarap lang da kaba pyndonkam ia ka jain bad kila ioh tan ia iwei pat sha ryngkew.
Ka Dorbar Shnong Mawlangwir bad ki bahaiing hasem jong kine ki saw ngut ki Khynnah kila pynpaw ia ka jingsngew nguh bad ai ka jingkhublei ia u heprit Kisen Wanniang uba la len lade ban pyllait im ia kine ki Khynnah.
Ka Pradhan Mantri Rashtriya Bal Puraskar ka dei ka khusnam ba heh duh ba ju ai sha ki nongshongshnong ka Ri India ha kaban pynkup burom ia ki Khynnah kum ka jingithuh ia ki kam shlur bad ka jingshakri ha ka imlang sahlang. Ki nongioh khusnam ha kane ka kynti la jied na ki 14 tylli ki Jylla bad ki Union Territories.
