Shillong, Nohprah 24: Ha kane ka sngi jongka jingrakhe ia ka Christmas, u Lat ka jylla u C.H Vijayashankar, ula leit jngoh ia ki 4 tylli ki iingmane kiba don ha Shillong ban ialehkmen lang bad ula phah ia ka jingai khublei kyrpang sha ki paidbah ka jylla Meghalaya.
U Lat ula leit jngoh ia ka All Saints’ Cathedral, Cathedral of Mary Help of Christians, Jaiaw Presbyterian Church bad ka Garo Baptist Church. Ha man la kitei ki iingmane ula iashimbynta ha ka jingrakhe ha ka jingbuh jingduwai kyrpang jong ka Christmas bad ula iakren ruh bad ki nongsharai balang kynthup ia u Bishop bad kiwei kiwei ki riewngeit.
Ha katei ka jingleit jurip u Lat u ai khublei Christmas da kaba banjur ia ka khubor kaba salonsar ha ka pyrthei ia ka jingsuk, jingieid bad jingkmen kaba iadei bad ka jingkha ia u Trai Jisu Khrist.
Ula iaroh ia ki balang ia ka kam kaba kila leh ban kyntiew ia ka jingmane bad ka bha ka miat ha ka imlang sahlang kaba pynmih ia ka jingmut jong ka jingiatylli bad jinglong salonsar ha ka jylla.
U Lat ula pynkut ia kane ka jingleit jngoh da kaba ai khublei ia ki paidbah ka jylla Meghalaya ka Christmas kaba suk bad u Snem Thymmai ba kmen bad ula kyntu ia baroh ban batskhem ia ka mynsiem jong ka jingtylli lang bad ka jingbha.
