Shillong, Nohprah 20: Ka tnat Building Bye Laws jong ka KHADC kala ioh lum T. 3,20,26,834 klur ka khajna ban ai jingbit tei Iing hapdeng u snem 2022-2024.
Ha u snem 2022-2023 ka jingioh lum pisa ka long T. 51 lak, 2023 ka long T.1,64,47, 685 bad ha u 2024 haduh Nohprah ka long T.1, 39,184.
Ia kane la pyntip da u Executive Member (EM) ka tnat Building Bye Laws Bah Teibor Pathaw haba jubab iaka jingkylli bala wanrah da u Nongialam ka Liangpyrshah Bah Titos W Chyne.
U Bah Teibor u la iathuh ba ka por ban ai jingbit ban tei iing ka shong haka jingkloi ki nongpan jingbit ban pyndep bad pynbiang iaki jingdonkam kat kum ka Building Bye Laws.
U la iathuh ba ka tnat Building Bye Laws ka dang duna briew watla kata ruh ki Ophisar ka KHADC ki ju leit ban jurip iaki jingtei bad ki trai Building.
“Ngi la thoh shaka tnat PHE bad MeECL ka Sorkar Jylla ba kim pat dei ban ai jingbit ha ka ban tan um bad Bording katba ki trai iing kim pat ioh jingbit naka KHADC” ong u Bah Teibor.
