Paw ka kyrteng u Dkhot BJP bad Businessman ba dawa pisa naki Nongkhaii ka Tura
Tura, Nailar 25: Ki Pulit ka Tura kiba tohkit ia ka jinglum pisa jubor na Iew Tura kaba lam sha ka jingkiew dor lut ki mar ki mata, kala lap ba ka kynhun u MDC ka BJP ba don ha along Bernard N Marak, kala shu pyndonkam jubor ia ka kyrteng jong ka Meghalaya Chamber of Commerce ban leh ia kine ki kam beain.
Ka Meghalaya Chamber of Commerce ka dei kaba la don la palat 37 snem ha Tura bad la seng ia ka ha u snem 1985, ia kaba la register ruh hapoh ka Society Act ha une hi u snem. Ka jingtreikam jong kane ka kynhun ka long ban peit thuh ia ka dor jong ki mar ki mata ba die ha Tura bad ban pynthikna ia ka jingbiang pyrla hapdeng ki Nongkhaii bad ki Nongthied Nongpet.
Ki Nongkitkam jong ka MCC ki kynthup ia u Obedstone Marak uba la khlad noh, uba bat kum u Secretary bad ruh uwei u Contractor bad Businessman ba pawnam ka Tura u Loverson Momin. Ka MCC kala sangeh treikam naduh ka jingkhlad noh jong ki katto katne ki Dkhot kum u Prem Rajan Gupta hynrei kam pat dei pat ka kynhun kaba la pynduh pyndam.
Ka Ejahar bala mudui da ki Pulit ka Tura mynta ka taiew pyrshah ia ki Kynhun u MDC ka BJP ba don ha along, kala ong ba kine ki briew kila pyndonkam beain ia ka Letterhead jong ka MCC bad u Registration No.SR/MCC-298/85 of 1985 ban lum pisa bun bah na ki Nongshong dukan ha sor Tura.
Kane ka jinglum pisa beain kala sdang naduh ka 11 tarik u Naitung 2011, lap ka jingtohkit jong ki Pulit.
“Watla kane ka Kynhun ba don ia kajuh ka kyrteng (MCC)ka ba dang treikam bad khlem da iaid kat kum ki kyndon jong ka Riti treikam, kala pynlong ia ka jingialang ba beain ha ka 11 tari Naitung 2021 halor ka jingbthah u Bernard N Marak ba khot sin u Rimpu bad la iarap da u Wilber Greham M Danggo, Anish M Sangma, Arup Nag, Rajest Barman, Patcheng T Sangma, Prabin Panthi bad kiwei kiwei” ong ka jingtohkit ki Pulit.
U Arup Nag u dei u Nongtrei Sorkar jong ka MeCOFED ha Tura bad ula shimti ruh ban pyniaid ia ka Night Bus Service ha ka jaka jong u Hynmen uba la khlad noh. Ula shah kemha u bnai bala lah halor ka jingwan pynpoi ia u droks na Shillong sha Tura da kawei ka bos jong u.
U Prabin Panthi bad u para, ula sdang ia ka Printing Press bad ula nang pyniar ia ka jingtreikam sha ka showroom kaba die ia ki tile bad kiwei kiwei ki tiar karma sum.
Kat kum ka ejahar ki Pulit, kine ki briew kila lum ia bun bah ka pisa ha ka kyrteng jong ka jinglong dkhot bad ka bai bnai na ki dukan kiba don ha Iew Tura.
Ha ka jingtohkit ba dang shu iaid malu mala jong ki Pulit, ki nongkitkam jong ka MCC kim shym la lah satia ban ai ia ki jingkhein ba bniah halor ka pisa bala ioh lum naduh u bnai Naitung 2011 haduh u Kyllalyngkot 2022.
Kim shym la lah satia ban ai ia kano kano ka kot ka sla kaba aibor ia ki ban lum ia kane ka pisa bad kim shym la lah ruh ban ai ia ki jingtip halor ka jingpyndonkam ia kane ka pisa, ong ka kaiphod ki Pulit.
U President kane ka Kynhun ula ujor ruh ia ka ejahar ha ka 9 tarik Risaw 2011 ha Tura Police Station kaba don ia ka jingsoi kyrteng kum u President bad muhor pyllun jong ka Meghalaya Chamber of Commerce.
‘Pynkiew ia ka dor ki mar ki mata, siew commission sha nga’
Kaei kaba lah ban sakhi kum ka jinglute pyllein pyllein ia ka kamai umsyep jong ki paidbah ka Ri-lum Garo, ki nongshong dukan ha Iew Tura la kynnoh ba kila shah pynbor bad hukum ban pynkiew ia ka dor jong ki mar ki mata bad ki tiar tei jingtrei da kane ka kynhun Meghalaya Chamber of Commerce bala khlieh da ki briew jong u MDC ka BJP Bernard N Marak.
Ka pisa bala ioh lum tam na kane ka jingpynkiew dor la siew pat kum ka commissioner sha kane ka kynhun.
Ka ejahar ki Pulit ha kane ka taiew hadien bala dep ka jingtohkit, kala kren shai ba ka Meghalaya Chamber of Commerce jong u Bernard kala pynbor ia ki nongshongdukan ka sor Tura ban pynkiew dor ia ki mar naduh ki soh, ki jhur, ki jingbam dihsha bad kiwei kiwei bad ia ka commission na kane ka jingpynkiew dor la ai pat sha kane ka kynhun daka pisa bad khlem kino kino ki jingthoh khnang ban lait na ka jingshah bat ha ki bor ka ain.
Ki Nongkhaii bar jylla ruh kila shah byrngem ba ki dei ban shim ia ka Clearance Certificate da ka jingsiew na u MDC ka BJP ba shah kem hashuwa ba kin ioh ia ka Trade Licence na GHADC, watla une u MDC um shym don satia ha ka bor ban ai Licence kaba dei ka kamram jong ka Tnad Taxation jongka GHADC.
