Shillong, Nohprah 13: U Chief Executive Member ka KHADC Bah Pyniaid Sing Syiem, hynne ka sngi Thohdieng, ula ong ba ka jingweng jingkyrshan jong ka Seng Congress kan ym ktah eiei ia ka Executive Committee kaba ialam da ka NPP.
“ka Congress kaba don 3 ngut ki MDC, kala rai mih noh na ka Khasi Hills Democratic Front (KHDF), kane kan ym ktah satia ia ka EC” ong u CEM.
Haba kylli la ka EC kaba ialam da ka NPP kan don jingma ha ka Dorbar Tlang lada jia ba wanrah ia ka No Confidence Motion, u CEM ula ong, “Ngin sa ia peit ha katei ka por” haba kyntait ban iathuh katno ngut ki MDC ki don ha ka seng NPP ne ha ka KHDF.
Kane ka jingweng ka Congress ia ka jingkyrshan ha KHADC kala wan jia hashuwa jong ka Dorbar Tlang jong ka Council ka ban long la 19 bad 20 tarik Nohprah.
Ki MDC ka congress ki kynthup ia u Bah PN Syiem uba bat ia ka shuki Deputy CEM, Bah Victor Rani – Executive Member uba dang shu pyniasoh sha ka Congress bad u Bah Ronnie Lyngdoh MDC ka Mylliem.
