Shillong, Nailar 25:Ki nongdie madan hapoh ka lama jong ka Meghalaya and Greater Shillong Progressive Hawkers and Street Vendors Association (MGSPHSVA) kila pynpaw iaka jingkmen ba hadien 7 snem ka jingiakhun, ka sorkar jylla kala rai ban pyntreikam noh da ka ain jong ka sorkar pdeng ban khmih ia ki nongdie dukan madan.
“Ka seng ki nongdiemadan ka pynpaw ia ka jinghun ba hadien hynriew tylli ki snem ka jingiakhun ban ioh ia ka Central Act na ka bynta ka kamai kajih ki nongdiemadan ka la kut noh mynta ka sngi” ong u General Secretary ka MGSPHSVA Bah Shane Thabah.
Kane ka jingsngew jong ki nongshong dukan madan kala mih ruh hadien ba ka Sorkar Jylla kala rai ban pynduh noh ia ka Meghalaya Street Vendors (Protection of Livelihood and Regulation of Street Vending) Act, 2014 hynrei ban pyntreikam bujli noh da ka ain jong ka sorkar pdeng ka Street Vendors (Protection of Livelihood and Regulation of Street Vending) Act, 2014
U Bah Shane ula pynpaw ba ka iingbishar Meghalaya High Court haba pynwai ia baroh ki mukotduma jong ki Nongshong dukan madan , kala bthah ia ka Sorkar Jyllla ban shna noh mardor ia ki Rule bad ban shna noh ia ki hapoh ka por khnang ban lait na kino kino ki jingeh bad ba kan shonghok ia baroh.
Ka Seng ki nongdiemadan ka kyntu ia ka Sorkar ba haba shna ia ki Rule kadei ban long kaba shai bad ban shim jingmut lang na baroh, khatmam na ki nongdie madan bad ka Seng ka kyrpad iaka Sorkar ba kan khmih ruh ia ki Draft Rule kiba ka Seng kala ai sha ka Sorkar na ka por sha ka por.
U Bah Thabah ula ong ba ka MGSPHSVA ka ai khublei ia baroh ki dkhot bad nongdie madan kiba la iaineh ha ka jingiakhun bad ula kyntu ia baroh ban ia ienglang kawei bad ban iatreilang da ka jingshemphang ryngkat bad ki bor sorkar ban wanrah ia ka TVC kaba khlain bad kaba lah ban treikam janai.
U la ong, ki Rule ki dei ban kren bad kdew shai halor ka jingthaw ia ka TVC kaba dei ban kynthup haduh 40 percent ki nongdie madan kum ki dkhot nalor kiwei,ban pynlong ia ka sorjamin, ban kdew ia ki jaka ba lah ban shong dukan madan bad ki bym lah ban shong bad ha ki Rule dei ruh ban kdew shai ba ki jaka ha syndah ki Heritage ne Traditional Market ki dei ki jaka kiba ym lah ban weng ia ki nongdiemadan bad ym lah ruh ban weng ne pynkynriah iaki nongdie madan ha ka kyrteng jong ka roi ka par khlem ka jingiakren ne ia pynbeit lang bad ki nongdie madan.
