Shillong, Nailar 25: Ki Pulit ka West Jaintia Hills kila kem ia arngut ki briew kynthup u I Love You Talang namar ka jingdonkti ban pyniap ia uwei u nongniah taxi kamai ka Sor Jowai dang shen.
Kine ki arngut ki runar, u I Love You bad u Ramesh Dkhar kila pyniap ia u Nongniah taxi kamai na Jowai sha Ladrymbai uba la tip kyrteng u Damehipaia Pareng, uba la jah rngai naduh ka 10 tarik Nailar.
Kat kum ka khubor ki Pulit, u I Love You Talang u dei ruh u snar pyniap briew uba la don bun ki case ha Jowai Police Station.
Ha ka jingtohkit ki Pulit, u I Love You u la phla ruh ba u donkti ban pyniap ia uwei u nongniah kali tourist ba kamai na Jowai sha Shillong uba la tip kyrteng u Fullmoon Kharsahnah, uba dei na ka shnong Larnai, West Jaintia Hills.
La iathuh ba u Fullmoon uba niah ia ka Maruti Swift Desire ba don u nombor ML04-D-1113, u la jah rngai bad ka kali ha ka 16 tarik une u bnai.
Ia ka metiap u Fullmoon la lap ha ka miet 16 tarik na Mynkre, East Jaintia Hills bad ha ka jingtohkit, la lap ba ki runar kila teh ia ka kti ka kjat bad ki la pyniap ia u da kaba ot na ryndang.
