Shillong, Nohprah 05 : U Myntri Rangbah ka Jylla Conrad K Sangma un sa leit iakynduh ia u Myntri kam iada ri Rajnath Singh ha New Delhi ban kyrpad ba un iarap lem halor ka jingtyrwa ka Sorkar Jylla ban ai jaka lem na ka Contonment ban pynkynriah ia ki 342 tylli ki Longiing na Them Metor, Them Iew Mawlong.
Haba pyntip ia kane ha ka sngi Balang, u Symbud Myntri Rangbah ba khmih ia ka Tnad Urban Affairs Bah Sniawbhalang Dhar ula ong “Lehse lashai ne lashisngi, u Myntri Rangbah u don jingthmu ban leit iakynduh ia u Myntri kam iada ri haba iadei bad kane ka mat”.
Hynrei ula ong ba ka Sorkar kan dang ban ithuh ia ka jaka na ka bynta ban pynkynriah ia kine ki longiing. “Ki (bor shipai) ki kwah ban iakynduh ia ngi. Ta ka daw balei ba u CM ula pan por ban iakynduh bad u Myntri iada ri. To ngin peit kaei kaban mih na kane ka jingialang” bynrap u Bah Sniawbha.
Shuwa kane, ka jingkyrpad kala mih ban pynioh jaka na ka jaka shipai da ka kynhun ka Harijan Panchayat Committee (HPC) ha ka jingialang bala pynlong da ka Sorkar Jylla.
Haba kylli halor ka blueprint ka Sorkar, kaba tyrwa ban pynkynriah ia kine ki nongshongshnong sha ka jaka ba hap hapoh ka Shillong Municipal Board (SMB), u Bah Sniawbha ula ong “Ka blueprint kala don. Hynrei lada don ka lynti kaba kham biang, ngi lah ban shim da kane ka lynti. Lada ki shipai ki ai jaka ia ngi, ngin shu ioh ei khlem ka jinglut. Lada ki ai, kan bha palat hynrei lada kim ai, kaei kaba ngin leh, ngi hap ban iaid kat kum ka blueprint”.
Nalor kane, u Bah Dhar u pyntip ba ka Sorkar kala kut jingmut ban pynbeit noh kham kloi kat kaba lah ia kane ka kam kaba la sahteng la slem bha.
