Shillong, Nailar 24: Ka Meghalaya High Court haka sngi Hatmajai kala bthah iaka sorkar jylla ban phah iaka Affidavit ha kaba iadei bad ki briew kiba la iap naka jingshah tohkit ha ki pulit naduh u snem 2012 hapoh ki 10 sngi ban wan.
Haka jingtian bishar iaka PIL, ka sorkar kala aiti ia ki jingtip sha ka iingkashari ia ka kyrteng jong ki briew kiba la khlad na ka jingshah tohkit ha ki pulit ha ka jylla naduh u snem 2012.
Ha ka hukum, ki arngut ki nongbishar jong ka High Court kila ong “Ka jylla kadei ban phah iaka Affidavit bad baroh ki kot ki sla bala pynbna khubor bad ki jingpyntip kiba la pynmih ha kaba iadei bad ka jingkhot ia ki bahaiing bahasem jong ki briew kiba la iap haka jingshah tohkit ha ki pulit ba kin wan mihkhmat ha ka jingtian bishar ia katei ka kam. Ia katei ka Affidavit dei ban phah ha kine ki 10 sngi kiban wan”.
Ka hukum kala ong, ba katto katne kiba dei ban ioh pateng ne kiba mihkhmat katkum ka Aiñ ia ki briew kiba la iap haka jingshah tohkit ha ki pulit naduh u 2012 ba kin wan mihkhmat bad ki nongiasaid aiñ hapoh ka iingkashari khnang ba kin lah ban ai iaka jubab kaba biang.
Ka jinglap jong u Amicus Curiae kala pynlong iaka iingkashari ban shimkhia ha kaba iadei bad ka Kaiphod jong ka jingtohkit Majistor halor ka jingiap jong uwei u briew haka 4 tarik u Nailar 2015 ha Jowai Police Station.
Ha ka kaiphod la don ki jingai jingmut naka liang jongu Additional District Magistrate, West Jaintia Hills District, Jowai bad ka mat kaba la kdew nyngkong ka dei “(1) Namar ba kala don ka jingpyniap dalade kaba la jia ha ka 23/08/2013 ha kaba 2 ngut ki briew kata u Kitbok Kshiar bad Daphah Salanki Rupon kila pyniap ialade hapoh ka along jongki pulit, ka tnad kam pohiing kan ai iaka jingmynjur ban pyndait aiki kor CCTV ha ki Police Station kiba don ha kylleng ka jylla da kaba phaikhmat khamtam eh sha ka Jowai PS. Ia ka CCTV dei ban pyndait noh kumba la pyndait ha Sadar Police Station, Shillong.”
Ka iingkashari kala shimkhia ruh halor katei ka jingai jingmut kaba la kdew shai ba ki ar ngut ki briew u Kitbok Kshiar bad Daphah Salanki Rupon, kila shah kynnoh ba ki pyniap hi ialade hapoh Jowai Police Station ha ka 23 tarik u Nailar 2013.
Hynrei ka lyngngoh ba iaka kyrteng jong kitei ki ar ngut ym shim la kynthup haka thup kyrteng jong ki briew kiba la ai da ka sorkar jylla kaba la kam ba kala pynbiang lut iaka kyrteng jong ki briew kiba la iap haka jingshah tohkit ha ki pulit haka jylla naduh u snem 2012.
Ka iingkashari kala bthah ia u nongpynkhreh iaka Affidavit ba un pynbiang iaka thup kyrteng jong kito kiba iap haka jingshah tohkit ha ki pulit haka jylla naduh u 2012 ryngkat ka jingbatai halor kaei ka daw ym shim la kynthup iaka kyrteng jongu Kitbok Kshiar bad Daphah Salanki Rupon ha katei ka thup kyrteng.
Dei ba nai ruh ia ki jingtip kiba pura halor ka jingiap jong kitei ki arngut kynthup iaka Post-Mortem Report bad Inquiry Reports, dei ban bsuh lang haka Affidavit bad dei ruh ban pyntip sha ki bahaiing bahsem jong kitei ki arngut kiba la khlad ia ka sngi ban tian bishar bad iaka hok ka jongki ban mihkhmat ha katei ka jingtian bishar.
La buh tarik ban shong bishar ia kane ka kam haka 19 tarik u Nailur.
