Shillong, Nailar 24: U MLA ka Trinamool Congress na Mawsynram, Bah Himalaya M Shangpliang u la kyntu ia ka sorkar jylla ba kadei ban wanrah da ki lad jingiarap na ka bynta ki nongrep kwai ha ka jylla hadien ka jingwan syllad ka jingpang ba shyrkhei ia ki dieng kwai.
Utei u MLA u iathuh ruh ba katei ka jingiap khlam ki dieng kwai kam dei shuh tang ha Mawsynram constituency hynrei kala pur kylleng ka ri thor ha rilum Garo bad ruh ha ki bynta jongka Khasi -Jaintia.
“Ka sorkar kadei ban ai jingiarap mardor ia kitei ki nongrep kwai bad ruh ban wad lad kumno ban ioh ia ki dawai ban khanglad ia katei ka jingiap khlam ki diengkwai kiba ju kyrshan ia ka jingdonkam ha ki iing ki sem jong ki man u snem,” ong u MLA.
La iathuh ruh ba ia katei ka jingeh ba ki nongrep ki kynduh u la rah teng ruh ha Iing Dorbar ha kaba u Myntri ba dei peit u la kular ban shimkhia mardor.
U la iathuh ruh ba ha ka 06tarik Naitung don ki nongwad bniah kiba la leit sha ki khappud jong ka Mawsynram kum ha ki shnong Umsawrang bad pynher da ki drone bad synreit dawai artad ia kitei ki dieng kwai.
“Kane ka jingleh katkum ka jingong jong ki, kadei tang ka jingpyrshang hynrei hadien kane pat ka khlem don ei ei shuh haduh mynta ruh bad ki dieng kwai ki nang pyut bad khyllem man ka sngi,” u la bynrap shuh shuh.
U MLA u la iathuh ruh ba ki nongrep ha ki khappud jong ka Mawsynram constituency ki kamai da ki lak tyngka ha ka shisnem tang na kaba die ia ki kwai hynrei mynta ka kynti pat ki la sah lut ha ka lyngoh bad ka jingkhuslai na ka jingiap khlam ki dieng kwai.
Na ka liang u MLA u buh jingkylli ruh ia ka rukom treikam jong ka tnad ka rep ka riang wat hadien ba na ka por sha ka por u la ju kyrpad ia ka sorkar ba kan tuklar mardor.
U Bah Shangpliang u pynpaw ruh ka jinglyngoh halor ka jingkynnoh ba ka tnad ka rep ka riang ka pynshlur pynban ia ki nongrep kwai ba kin phai khmat noh sha ka rep sohtrun ha ka jaka ba kan wad ia ki lad ki lynti kumno ban iakhun pyrshah ia katei ka khlam.
