Shillong Nailair 23: U Chairman ka KHADC Bah Lamphrang Blah ryngkat bad u MLA barim ka Mawphlang Bah Kenedy Khyriem hynne ka sngi ba-ar, kila kyrpad ia u Symbud Myntri Rangbah ka jylla Bah Prestone Tynsong ban shna noh iaka surok MB Road ne ka surok na Mawphlang sha Balat ban pynsuk ia ka leit ka wan jong u paidbah.
U Bah Kenedy ula pynpaw iaka jingsngewkhia halor ka jingsniew palat jong ka surok naduh na Mangngap, Mawphlang, Tyrsad, Lynïong khnang ba ynda pynlong iaka lympung jong ka Seng Khihlang ha u Iaiong 2023 kan long kaba iaid beit iaid ryntih.
“U Symbud Myntri Rangbah u la kular ban shimkhia bad mynne u la kren ruh ia ki ophisar bad un sa leh ia kaba donkam” ong u Bah Kenedy Khyriem haba iakren bad ki nongthoh khubor.
U la ong, ba ha katei ka jingiakynduh la iadonlang ki nongialam jongka Seng Khasi Tyrsad bad ka Dorbar Shnong Kyrphei kiba la kyrpad ia u Symbud Myntri Rangbah ban pynbiang iaka surok, ka lynti syngkien bad ka madan khnang ba ka jingpynlong iaka Lympung ka long kaba jop.
U Bah Kenedy u la pyntip ba ia ka lympung jong ka Seng Khihlang la dei ban pynlong ha u 2021 ha shnong Kyrphei hynrei namar ka jingsaphriang ka khlam jingpang, ym shim la lah ban pynlong ia kane ka lympung ha utei u snem kumta yn pynlong noh ia ka ha ka 14, 15 bad 16 tarik u Iaiong 2023.
