Nongpoh, Nailar 23: Ki paidbah nongshong shnong ka Baridua Jorpul, mynta ka sngi ki la leit ban tur sha ka ophis u Sub Divisional Officer ka tnat MeCEL Byrnihat Division ban pynpaw ïa ka jingbitar halor ka jingsngap mynthi jong kane ka tnad ban weng ïa ki jingeh u paidbah ha kaba ïa dei bad ka jingbym ioh bording ilektrik mynta la kumba 20 sngi eiei.
Kumba la ujor da ki nongshong shnong, la ong, ba ka tnad MeCEL kam shem la shimkhia ïa ka jingud jingnam jong ki paidbah ka shnong Baridua Jorpul kiba la hap ban shong dum khari khari tang namar ka jingbthei jong u transformer na ka por sha ka por bad watla ki la pyntip sha ka ophis u SDO halor kane ka jingeh, hynrei kam shym la don kano kano ka jingshimkhia.
Haba kren bad ki Nongthoh Khubor hadien ka jingkynduh ïa u SDO, ka Kong N Dkhar, ka la pynpaw ïa ka jingeh ba la mad da ki nongshong shnong kiba la hap ban shongdum beit man ka por tang na ka daw ka jingbym biang jong u transformer uba ju man ka por kata tang hapoh shisnem ka jingpyntreikam ïa u.
Ka la ïathuh ruh, ba wat dang ha kine ki 10 bnai jong u snem ba la dep, ka tnad MeCEL ka la wan buh ïa u transformer ha kane ka shnong hynrei dang ha kine ki sngi u la bthei biang bad ki paidbah ki lah ban hap ban shongdum mynta la palat 20 sngi.
Ka ong ba mynta ka sngi, ki nongshong shnong ba la lamkhmat da ki longkmie ki la leit tur sha ka ophis u SDO ka Byrnihat Division ban dawa ïa u transformer ba thymmai ha kane ka shnong bad hadien ka jingïania kaba la palat shikynta eiei, u SDO u la kular ban pynïoh noh ïa u transformer ha kane ka shnong tang hapoh ar ne lai sngi.
