Shillong, Naiwieng 23 : U Nongaiktien ba rangbah duh ka BJP Bah M.H. Kharkrang ha ka sngi Saitjain ula ong ba kala donkam ia ka party (BJP) ban pynkylla noh ia ki buit ialap elekshon ha Jylla Meghalaya.
Kane ka jingkynthoh jong u kala mih hadien ba ka BJP kala rem kput ha ka elekshon shiteng samoi ba dang shu dep ha Gambegre ha kaba u kyrtong bad MDC ba mynta ka GHADC Bernard N Marak, ula duh ia ka security da kaba ioh tang 710 vote.
Haba iakren bad ki nongthoh khubor, u Bah Kharkrang ula kubur ba ki don shibun ki kam kiba la iaid bakla na ka bynta ka party. Ula ong ba ka por kala dei ia ka party ban kynthoh pyrshah ia ki jingkynnoh kam niam kaba la treikam pyrshah ia ka party ha ka por elekshon.
“Bad mynta ka sienjam ba hap leh ka long, ngi hap ban shong bad bishar bad wad ia kaei kaba iaid bakla bad lehse ngi lah ban hap pynkylla ia ki buit treikam jong ngi, kumno ngi iaid ialap elekshon ha Meghalaay namar bun sien ha man ba don ki elekshon, ki ju mih ki jingkynnoh kam niam bad mynta ngi hap ban leh eiei pyrshah ia kane. Ngi la pyrshang ha ka elekshon 2023 hynrei nga sngew ba ki dang don shibun kiei kiei ia ngi ban hap leh” ula ong.
“Kumta, nga sngew ba ka sienjam ba hap shim mynta ka long ba baroh ki nongialam bala rim jong ka Party kin hap shong bad kren hok bad khmih bniah ia kiei ki jingduna bad hadien ngi hap ban pynbeit ia ki lynti treikam jong ngi shuwa ka elekshon ban wan” ula bynrap.
Haba kylli, une u Nongaiktien ka BJP ula ong “Ki don shibun ki kami a ngi ba hap leh namar haba phi kren iano iano ruh, baroh ki mynjur ba lada ka wan ka Sorkar BJP, ki kam pynroi kin wan, ka roi ka par kan don namar kila ia bishar ba kumno ka Jylla jong ngi ka roi haba nujor bad kiwei ki Jylla. Hynrei haba poi ha ki bynta ba khatduh shuwa ka elekshon, hashuwa ka jingiathep vote, ka ju mih ka jingkynnoh kam niam”.
“Kane kala jia la slem bha bad nga sngew mynta ba ha ka elekshon ban wan, ngi hap ban wad ia ki lad ki lynti kumno ban leh eiei pyrshah ia kane” ula kynthoh.
 ban pynkylla noh ia ki buit ialap elekshon ha Jylla Meghalaya.){kind=link}