Shillong, Nov 22: Ka kynhun ialehkai Cricket ka Meghalaya hynne ka sngi Thohdieng kala ialehkai bha ban pynthikna ba ka jingiakhun pyrshah iaka Delhi ha ka U-19 men’s Cooch Behar Trophy Elite Group A- kan poi sha ka sngi kaba saw kaba dei syndon ka sngi kaba kut jong ka jingiakhun, ha ka sngi Saitjain ha MCA Ground, Polo.
Hynne ka sngi, haba ka Meghalaya kala leit ban tied ha ka sien ka ba-ar ha ka sngi balai jong ka jingialehkai kala kamai 141 run bad hap 5 wiket bad ka dang hap ban beh sa 222 run ia ka Delhi kaba la kamai haduh 623 run bad hap tang 5 wiket ha ka jingleit tied ha ka First Innings.
Ki nongialehkai ka Meghalaya kiba kynthup ia u Manthan Dey ula lah ban kamai 34 run bad u Gaurav Narleng ula kamai 30 run bad kila lah ban iarap ia ka Meghalaya ban tied haduh ban da kut ka sngi. Ka jinghap noh u Gaurav uba la kamai 95 ha ka First Inning kala long ka jingduhnong kaba khraw ia ka Meghalaya bad u Heiyomiki Ryngkhlem ula hap ban shongthait noh na ka jingmynsaw hadien ba ka bol kala dei iaka helmet kaba ula phong ban iada ia ka khlieh.
Haduh ba kut ka jingialehkai hynne ka sngi, u Kshitij Singhania ula kamai 6 run bad ym pat out katba u Shavian Blah ula kamai 14 run bad ym pat out bad kine kin bteng ban leit tied biang lashai ka sngi ban ialeh ban neh slem haduh ban da kut ka sngi jong ka jingiakhun.
Ka Delhi kaba la kamai 468 run bad hap 2 wiket, kala bteng ban tied biang hynne ka sngi bad kala lah ban kamai sa 155 run hashwa ban pynbna ba kala sangeh noh syndon ban tied.
U Dhanya Nakra, ula ioh ia ka Century ka jongu bad hadien kane ula shah pynkhyllem noh ha u Angkit Tamang.
U Aaryavir Sehwag ula bteng ban tied biang bad ula kamai haduh 297 run hashwa ba yn shah pynkhyllem noh ha u Rudra Singh Rathore.
