Shillong, Risaw 06: Ki nonghikai jong ki skul Primary ha kylleng ka Meghalaya kin pynlong ia ka Rally ha Nongbah Shillong ha ka 7 tarik u Risaw namar ba ka ka tnad pule puthi kam shim la leh eiei ia ki mat jingdawa kiba la slem ka jongki.
Ka All Meghalaya Primary School Teacher’s Association (AMPSTA) kala pynbna ba kane ka Rally kan sdang ha ka 10 baje mynstep na Golf Link Community Hall, Pynthorumkhrah bad yn iaid sha Bishop Cotton Road, 4th Furlong bad Iew Polo hashwa ban wan phai biang na ka jaka kaba kila sdang.
Ka Association kala pyntip ba kane ka jingiakhih kadei ban pyntip paitbah halor ka jingbym pyntreikam ia ki mat jingdawa da ka tnad sorkar.
Ka Association hapoh ka jingialam u General Secretary u Bah FC Shullai, ula ong ba ki nonghikai kila iai dawa ban pynneh ia ki kam kiba la bhah ne Sanction Posts ha Government bad Deficit School hadien ba la shongthait, ban thungkam mardor ha ki kam kiba thylli ha ki Lower Primary School, ban bhah shuh shuh ia ki post na ka bynta ki Single Teacher LP School bad ban pyntreikam ia ka Government PRAN Scheme.
Nalor kane, kala dawa ruh ban pyllait ia ki nonghikai Primary na ki kam BLO, ban thungkam pura ia ki nonghikai LP School kiba la shah thungkam shwa u snem 2007 bad ia ki nonghikai LP School ki bym dei jong ka sorkar bad ban pynduh noh ia ka hukum kaba la pynmih da ka tnad pule puthi ha ka 27 tarik u Naitung 2026 ha kaba iadei bad ki skul kiba la ioh jingithuh.
Ka AMPSTA kala pynpaw ba wat hapdneg ka jingiai bteng ban phah ia ki jingthoh, ka sorkar kala pulom ban shimkhia ia kitei ki mat, kaba la pynlong ia ka Association ban ym banse ban pynlong noh da ka rally paitbah.
