Shillong Risaw 06: Ka Toastmasters International, kaba dei ka kynhun kaba don ha kylleng satlak ki ri, kala ioh mynta ban suhthied ha ka jylla Meghalaya da ka jingseng ia ka Shillong Toastmasters Club, kaba la ioh ban pynlong ia ka jingialang ha ka sien kaba nyngkong ha ka Sngi u Blei jong ka taiew ha Shillong Club.
Ha ka jingrakhe ia ka jingsdang ia kane ka Shillong Toastmasters Club, la wan ban plie da u Chief Electoral Officer ka Meghalaya u B.D.R. Tiwari uba la ai jingkren kyrpang ha kane ka jingialang halor ka jingkongsan ban long kiba tbit bad ai jingkren, ban long kiba skhem jingmut bad ban long ki nongialam ha kino kino ki bynta kiba iadei bad ki paitbah.
Ia ka Toastmasters International la seng ha u snem 1924 bad kala suhthied ha kylleng ki ri bad mynta kane ka kynhun ha ka sien kaba nyngkong eh, kala ioh ban pyniar ia ka shnad treikam jongka hapoh ka Nongbah Shillong.
Kane ka Club kan ialeh ban saindur ia ka sap ka phong ha kaban ai jingkren bad ban don ia ka jingtbit ban long kum ki nongialam bad ban iai kiew shaphrang.
Ha kane ka kynhun ha ka Jylla ka kynthup ia ki riewshimet kiba trei ba ktah ha ki liang bapher bapher naduh ki Engineer, Nongiasaid aiñ, Nongkhaii, ki riewpawkhmat bad kiwei kiwei.
Ha kane ka jingialang la pynithuh ruh ia ki nongkitkam jong ka Shillong Toastmasters Club hapoh ka jingialam ka President ka Preity Agarwal, ka Diksha Sureka Gupta ka Vice President Education, u Naveen Singhania u Vice President (Membership) bad ka Nivisha Chamaria ka Vice President (Public Relations), u Gunjan Jhunjhunwala kum u Secretary, u Pragya Agarwal kum u Treasurer bad ka Prerna Jhunjhunwala kum ka Sergeant at Arms (SAA).
