Thung u VC Incharge ia ka Inquiry Committee | Kyrpad ia ki samla pule ba sangeh shah thngan

Shillong, Naiwieng 18 : Hadien ba shimti ia ka shuki, u Vice Chancellor Incharge ka North Eastern Hill University (NEHU) Prof Nirmalemdu Saha, ula thung ia ka Inquiry Committee ban tohkit ia ki jingkynnoh pyniaid kam bakla bad jingbym lah treikam ka Ophis hapoh ka skulbah, kaba lam sha kane ka jinglong jingman ba mynta.

Ula pyntip ruh ba ia ka kaiphod jong kane ka Committee yn sa aiti pat sha ka Committee ki arngut ki dkhot bala thung da ka Ministry of Education dang shen.

U Saha ula kyntu ruh ia ki samla ba iakhih ba kin pynsangeh noh ia ka jngshah thngan ba khlem pud, kaba la iaid mynta la 14 sngi kynthih.

Ha ka kyrwoh, u Saha ula ong “Ban leh eiei halor ki jingsngewkhia kiba hakhmat, la thaw ia ka Inquiry Committee kaba kynthup ia ki nongmihkhmat na baroh ki kynhun kiba don ha NEHU. Ka komiti kan trei shitom ban pyndep ia ka kam bad ia ki jinglap jong ka, yn aiti sha ka Committee bala thung da ka Ministry of Education. Nga sngewnguh ia ka jingaiti bad jingpyrshang jong baroh ki dkhot kiba don bynta ha kam bad kyntu ia baroh ba kin kyrshan ia kane na ka bynta ban wanrah ia ka jingshai bad ka jingkitkhlieh.”

“Nga ngeit skhem ba ka bha ka miat jong ki samla pule ka dei ka jingsngewkhia kaba hakhmat eh jong ngi. Kum ka skulbah, ngi don hangne ban pynheh pynsan bad pynkupbor ïa ki samla pule jong ngi, bad nga pynthikna ïa phi ba man ka rai ba la shim ha kane ka por kan buh hakhmat eh ïa ki jingmyntoi jong ki. Nga kyrpad ïa baroh ki dkhot ba don ha NEHU ban iawan lang, ban buh sharud ia ki jingsngew iapher, bad ban pynleit jingmut ha kawei ka thong ba iakwah lang kata ban wanrah ia ka sawdong sawkun kaba sngewtynnad hapoh ka skulbah” ula ong.

Ula ong ba ka NEHU, Shillong kala sakhi ia ki jingiakhih bapher bapher ha kine ki taiew bala leit noh.

“Kum u Vice Chancellor In-Charge, nga kwah ban kren sha baroh kiba don hapoh ka University bad kular ia baroh ba ngi la kut jingmut shisha ban wanrah pat ia ka jingsuk, ka jingjai jai bad ka jinglong jingman kaba sngewtynnad na ka bynta ka jingpule bad ka roi ka par” ula kular.

Haba pyntip ba ula shimkhia hakhmat eh ia ka bha ka miat ki samla pule kiba dei u klongsnam bad ka mynsiem jong ka NEHU, u Saha ula ong “Nga la iakren markhmat bad ki samla pule la bunsien, bad pynpaw ia ka jingsngewkhia ia ka koit ka khiah bad ka bha ka miat jong ki, khamtam ia kane ka jingia shah thngan”.

“Wat hapdeng ka jingpyrshang jong nga kat kaba lah ban pynkohnguh ia ki ba kin weng noh ia ki jingia khih, nga don ka jingkyrmen ba lyngba ka jingiakren bad ka jingiasngewthuh lang, shen ngin sa lah ban pynbeit ia ka kam” ula ong haba bynrap ba ula iakren khlem sangeh bad ka kynhun ki Doktor kiba peit thuh ia ka koit ka khiah ki samla kiba shong shah thngan.

Nalor kane, u Saha ula pyntip ba ula pynlong ruh ia ki jingialang bad ki kynhun bapher bapher kynthup ki nongmihkhmat ka NEHU Students Union (NEHUSU), ka NEHU Non-Teaching Staff Association (NEHUNSA) bad ka NEHU Teachers Association (NEHUTA).

“Kine ki jingiakren ki la long kiba tei, bad nga sngewkmen ban pyntip ba ka NEHUNSA ka la mynjur ban ailad ia ka jingtreikam noh jong ki katto katne ki tnad ba kongsan ka skulbah.Kane ka sienjam ba kongsan kan pynthikna ba ka jingpynbiang ia ka scholarship kan iaid shaid shaid bad ki kam pule puthi ruh ki iaid khlem ka jingthut” ula ong.