Pynbna ban khang khyrdep ia ka NEHU naduh ka 6 tarik Naiwieng
Shillong, Naiwieng 05: Ki samla pule ka North Eastern Hills University (NEHU) Shillong ha ka sngi Ba-ar, kila pynbna ban pynlong iaka jingïakhih daka ba jingshah thngan khlem pud sngi bad haka juh ka por ban khang khyrdep iaka NEHU naduh ka 6 tarik Naiwieng 2024.
Ia kane ka rai la pynbna da u General Secretary jong ka NEHU Student Union (NEHUSU) samla Toniho Kharsati hadien ka jingiakynduh kaba lyngkot bad u Vice Chancellor (VC) ka NEHU, Prof PS Shukla.
U samla Toniho Kharsati u la ong ba watla u Vice Chancellor u la mynjur ban iakynduh ia ki samla pule hynrei um pat long uba kloi ban iakren ia ki jingdawa jong ki samla pule kiba la buh ha khmat jong u naduh u snem 2022.
“U Vice Chancellor um nud ban shimkhia halor ki jingdawa jong ngi kiba ngi la ait lyngba ki dorkhas naduh 2022. Kumta naduh lashai ka 6 tarik u Naiwieng ngin leit khang khyrdep noh iaka NEHU bad naduh mynta ka kynti ngin sdang iaka jingshah thngan ba khlem pud sngi tad haduh ba ki bor khmih iaka NEHU kin shim ia ki sienjam ban pynurlong iaki jingdawa jong ngi” ong samla Toniho.
U samla Toniho u la kyntu ïa ka Sorkar Jylla ba kan tuklar noh mardor bad ban thung ïa u Vice Chancellor ba thymmai, uba don ka jingkitkhlieh naka bynta ka bha ka miat ki samla pule bad ka NEHU baroh kawei.
U President ka Khasi Student Union (KSU) NEHU Unit, samla Shibaitlang Rymbai u la iawer iaki para samla pule ka NEHU ban iasnohkti lang haka jingïakhih tad haduh ba u VC un shim iaki sienjam ban pynurlong iaki mat jingdawa ki samla pule.
“Kine ki mat kim dei tang ki mat jong ki samla pule na ka jaitbynriew Khasi hynrei ki dei ki mat kiba ïadei bad baroh ki samla pule na ki jaidbynriew bapher bapher ha NEHU. Kumta nga kyntu ïa baroh ban ïasnohkti lang bad ka KSU NEHU na ka bynta ka jingshah thngan khlem pud” ong u samla Shibaitlang.
Hashuwa kane ki samla pule ki la pynlong ia ka jingiaid paidbah naduh Central Library haduh Administrative Block ban aiti ia ka thup jingdawa sha u VC.
Kine ki mat ki kynthup ka jingrem ka bai Hostel, ka jingbym biang ki Hostel, ka jingdawa ban weng kam ia u Registrar, Deputy Registrar bad kiwei ki ophisar ba shu thung beaiñ da u VC ka NEHU bad ban dawa ban thung mardor ia u Pro-Vice-Chancellor.
Ia kane ka rally la pynlong da ka seng samla pule ka Khasi Student Union (KSU) NEHU Unit bad ka NEHU Student Union (NEHUSU).
 samla Toniho Kharsati hadien ka jingiakynduh kaba lyngkot bad u Vice Chancellor (VC) ka NEHU, Prof PS Shukla.){kind=link}