Nongpoh, Naiwieng 04 : Ka Synjuk ki Rangbah Shnong ka Ri-Bhoi District, kila pynpaw ia ka jingpyrshah kaba jur halor ka jingthmu jong ka Tnad Bording ban pyndait noh da ki Smart Meter ha kylleng ki shnong nongkyndong jong ka District.
Ka Synjuk kala pynsngew ia kane ka sur ha ka jingiakynduh ia u Deputy Commissioner ka District Abhilash Baranwal, hynne ka sngi Nyngkong. Ia ka Synjuk la ialam da u Chairman Bah BB Makdoh.
Haba iakren bad ki nongthoh khubor, u Bah Makdoh ula ong ba ka Synjuk kam pdiang satia ia ka jingthmu pyndait Smart Meter khnang da iasyllok bad pynshai bha ia u paidbah.
U Bah Banbuhai Makdoh, Chairman ka Synjuk u la pynpaw ba ka nongrim ba pyrshah ka long ba ka tnad sam bording kam shem la pynshai paidbah halor ka jingpyntreikam ne ka jingmyntoi na u ne u meter.
U la ong ruh, ka Synjuk ka pynpaw ruh ia ka jingsngewdiaw ba ka tnad sam bording ka la shu bunkam tang ban pyndait meter thymmai man ka por hynrei ban shimkhia ban kylliang ne thung thymmai ia ki post ilektrik kiba la jan khyllem ha kiba bun tylli ki shnong ki thaw pat, kane ka tnad ka shu sngap man man.
“Bun ki nongshong shnong mynta ki la ud na ka jingkiew ka bai pyndonkam bording hadien ba la pyndait khlem jingpynshai da ki nongtrei ne ka Komiti ba la bynshet da ka tnad sam bording ban leit pyndait ia kine ki meter”, ong u Bah Makdoh, da kaba khot wer ruh ia kiwei ki Rangbah Shnong ba kin pyrshah shwa ia kane ka jingthmu pyndait smart meter khlem ka jingpynshai kaba tikna.
Na ka liang u DC ruh u la, kular ban shimkhia halor kane ka jingpynsngew jong ki nongialam ka Synjuk ki Rangbah Shnong da kaba ia kren bad ki bor ka tnad sam bording.
