Shillong, Naiwieng 04: Ka Meghalaya Football Association kan pynsangeh shwa shipor iaka Meghalaya State League 2024 hadien ba la pyndep ia ki jingiakhun ha ka Group Stage khnang ba yn ailad bad ai por ia ki nongialehkai ba kin pynleit jingmut ha ka National Football Championship jong ka Santosh Trophy 2024-25.
Ka round kaba nyngkong jongka All India Football Federation Senior Men Tournament kan long mynta u bnai bad kumta ka MFA ka buh shwa hakhmat ia ka kynhun ialehkai Football kaban mihkhmat ia ka jylla.
Ka Meghalaya ha kaba nyngkong ha don haka Group D hynrei ka AIFF kala pynrung noh ia ka Meghalaya ha ka Group E kaba kynthup ia ka Arunachal Pradesh, Assam bad Nagaland. Tang ka kynhun kaba long ka lahduh haka Group kan ioh ban rung sha kawei pat ka bynta jong ka jingiakob, kumta ka long kaba kongsan bha iaka kynhun jong ka jylla ba kan pynkhreh bha ialade.
Ha ka MSL ki don bun tylli ki kynhun kiba pyniasoh bad ka MFA ki iashimbynta ha katei ka lympung iakob ialehkai football bad kiba bun ki nongialehkai kiba mihkhmat iaka jylla Meghalaya kidei kiba iashimbynta ha ka MSL.
Ka jingiakhun kaba khatduh jong ka Group Stage ka MSL 2024 kan long haka 7 tarik u Naiwieng.
U General Secretary ka MFA u Bah Sunesh Syiem bad u Dr Lumbor Mawsor uba long u MSL 2024 Tournament Director bad MFA Vice-President, kila pyntip ba kila don ia ka jingthmu ban pynlong iaka Quarterfinals ha ka 11 tarik u Naiwieng bad yn sa pynlong ia ka Semi Final hadien jong katei, hynrei kane pat kan ym ailad iaka kynhun ialehkai jong ka jylla ba kan ioh por bha ban pynkhreh bha ban iashimbynta ha ka Santosh Trophy.
Ka Meghalaya kala wan baar ha ka Santosh Trophy 2022-23 bad ka MFA ka don ia ka jingthrang ban ioh rah ia katei ka khusnam mynta ka kynti.
