Dawa thung Pro VC ha Shillong bad Tura Campus
Shillong, Risaw 30 : Ki samla pule ka North Eastern Hill University (NEHU) ha ka sngi Balang, kila leit kerkut ia ka Ophis treikam jong u Vice Chancellor ha Administrative Block, ban pynbor weng kam mardor ia u Registrar, Deputy Registrar bad kiwei ki Nongtrei kiba shu thung sopsop.
Kane ka jingleit kerkut kala wan jia namar ka jingleh mynthi jong u Vice Chancellor Prof PS Shukla ban wengkam noh ia u Resgistrar Colonel (Retd) Omkar Singh lem bad u Deputy Registrar (Academics) Amit Gupta.
Kiwei pat ki nongtrei ba dawa wengkam ki kynthup ia u Officer on Special Duty (OSD) Dr Debashish Chowdhary bad u Incharge ka NEHU Guest House Sajan K Job.
Ki samla pule kane ka skulbah kiba don hapoh ka lama jong ka NEHU Students Union (NEHUSU) bad ka Khasi Students Union-NEHU Unit, kila rah la ki placard ban tur sha Administrative Block ban pynpaw ia ka jingpyrshah kaba jur ia ka jingmynthi jong u Vice Chancellor ia ka jingdawa.
Dang shen ki samla pule ka NEHU bad ka NEHUTA kila kynnoh ba u VC ka NEHU u la pynkhien iaki kyndon thungkam bad leh shilliang daka ba thungkam iaki briew lajong haki kyrdan bapher bapher bad kyntait iaki trai Jylla, kiba don ka kyrdan ban shimti ia kitei ki kam.
Hapdeng ka jingiakhih, u VC ka NEHU u Prof PS Shukla u la wanpoi shaka Administrative Block ban pynksan ia ka jing thungkam ia kine ki 4 ngut ki Ophisar hapoh ka skulbah.
U VC u la kren shaki samla pule ba iakhih daka ba ong baka NEHU kala thung daka Inquiry Committee bad ka Sorkar Jylla ruh ka don bor ban thaw ia ka Committee ban tohkit iaki jingkynnoh kynrum kynram hapoh ka skulbah.
Ki samla pule bad ki nonghikai kila kynnoh ba u Registrar, Colonel (retd) bad u Deputy Registrar kim long i bit bad kim kot bor ban shimti iala ki kam bala bynshet iaki hapoh ka skulbah NEHU.
“Ngim iahap ia kane ka jingleh u VC namar wat hapdeng ka jingkynrum kynram u dang nud ban shim shuti. Haka jingshisha udei ban don hapoh NEHU ban iakren pynbeit iaki kynrum kynram. Lada um don ka jingkitkhlieh iaka bha ka miat ki samla pule bad iaka skulbah NEHU, kan bha ba un mih noh na kane ka skulbah” la pynpaw ki samla pule kiba iatur sha Administrative Block.
Ka NEHUSU bad ka KSU-NEHU Unit kila aipor tad haduh ka shiteng miet jong ka 4 tarik Naiwieng ia u Vice Chancellor ba un weng noh kam ia kine ki 4 ngut ki nongtrei lem kumta kin pynlong da ki jingiakhih ba tyngeh.
Nalor kane, kine ki arseng kila dawa ruh ia u Vice Chancellor ban thung noh ia ki Pro Vice Chancellor ha ki artylli ki campus ka skulbah-ha Shillong bad Tura Campus.
 Omkar Singh lem bad u Deputy Registrar (Academics) Amit Gupta.){kind=link}