Dhubri, Nailar 22 : Ka All Assam Students’ Union (AASU) ka la kynthoh tyngeh ia ka sorkar pdeng bad ka sorkar jylla halor ka jingbym lah ban khang dam ia ki jaka khappud hapdeng ka India bad ka Bangladesh.
Ka AASU kala ong ruh ba ka jingkiew jong ki kam pyntriem jong ki lehnoh Jihadi ha Assam ka dei namar ka jinglaitluid ki jaka khappud hapdeng ka India bad ka Bangladesh.
Kala ong ruh ba kine ki jaka khappud ba laitluid ym tang ba ki plielad ia ka jingwan rung beain jong ki briew napoh Bangladesh shapoh Assam, hynrei ka la iarap ruh ia ki lehnoh jihadi bad kiwei pat ki kynhun pyntriem ba kin wan tuid sha kane ka jylla.
Lah ban kdew ba na ka liang ki nongmihkhmat ka AASU hapoh ka jingialam u general secretary, u Shankar Jyoti Baruah ka la pynlong ka jingleit jurip ia ki jaka khappud hapdeng ka India bad ka Bangladesh ha Dhubri district ka Assam ha kane ka sngi U Blei ba la lah.Kine ki dkhot ka AASU ki la leit ban jurip ia ki jaka khappud hapdeng u pillar number 1001 haduh 1031.
Na ka liang ki dkhot ka AASU ki pynpaw ka jingsngew kyndit halor kane ka jinglaitlan ki jaka khappud ha ki bynta jong ka wah Gangadhar kaba don ha ki bynta jong ka Binnachara hajan Golakganj ka Assam.
“Ngi la dep ban maham ia ka sorkar pdeng bad ka sorkar Assam halor ki jingmih lyngba ka jingbym ker sainar ha kine ki bynta khappud jong kane ka wah, hynrei ym shym la don ba patiaw halor kane,” ong u general secretary ka AASU, u Shankar Jyoti Baruah.
Ula ong shuh shuh ba mynta ki lehnoh jihadi bad kiwei pat ki kynhun pyntriem kila wan rung sha Assam na Bangladesh da kaba pyndonkam ia kine ki jaka khappud kiba khlem jingker.
Shuh shuh une u nongialam ka AASU u la kynthoh tyngeh ia ka sorkar pdeng bad ka sorkar Assam halor ka jingpulom ban khangdam ia ki jaka khappud hapdeng ka India bad ka Bangladesh, kata wat hadien 37 snem jong ka jingiasoi ia ka Assam Accord.
“Mynta kala kynjoh sha ka 37 snem naduh ba la asoi ia ka Assam Accord.Kawei na ki kyndon jong kane ka jingiasoi kalong ban pyndep ha kaba iadei bad ka jingkhang dam ia ki jaka khappud hapdeng ka India bad ka Bangladesh.Hynrei ym pat shym la pyntreikam satia,” ong shuh shuh utei u nongialam ka AASU.
