New Delhi, Nailar 22 : Na ka liang ka Seng Congress ka la kynnoh ba ki kynhun pyntriem ki la synshar ia ka jylla Tripura hapoh ka jingialam jong ka sorkar synrop ba la lamkhmat da ka seng BJP.
Ka party Congress ka la ong ba ki nongialam jong ki party liang pyrshah ha Tripura ki don hapdeng ka jingsyier iala ka jingim namar ka jingdon jong kine ki kynhun runar.
“Ym don jinglaitluid, kam don ka synshar paidbah ha Tripura. Ngam tip la Ngan dang im ne em.Ki la don haduh hynniew tylli ki jingpyrshang ban shim ia ka jingim jong Nga,” ong u heh nongialam ba la rim ka Tripura Congress, u Sudip Roy Barman.
Nalor kata u la ong ruh ba baroh ki nongialam Congress ki don hapdeng ka jingsyier. “Ngim lah ban pynlong ia ki rally sain hima bad ki jingialang.Ki nongtrei jong ngi ki la ngat ha ki jingshah thombor namar ka jingiashim bynta ha ki jingiakhih sain hima,” ong shuh shuh u Barman.
Da kaba kynnoh ba ka synshar paidbah ka don hapdeng ka jingsyier hapoh ka jingsynshar jong ka BJP ha Tripura, une u nongialam Congress ula dawa na ka bynta ban pynjari da ka synshar president (President’s rule) ha ka jylla.
Nalor kata ula dawa ruh ia ka jubab na u Myntri Rangbahduh (PM) Narendra Modi la u mynjur ne em halor ka mat jong ka jingiaumsnam kaba dang iai bteng ha Tripura.
“Ia ka jingsynshar jong ki kynhun pyntriem la pyllait laitluid.Tang hapoh ki 52 bnai ka jingsynshar jong ka BJP ha Tripura, kila don haduh 604 tylli ki jingjia shah pyniap ba la rejistar, katba ia kiba bun kiwei pat la shu shim beit ba kadei ka jingpynkut hi iala ka jingim. Na ka liang ki bor pulit ki la ai jingiada ia ki riew bymman,” ong shuh shuh u Barman.
Haba kren halor kane ka juh ka mat, na ka liang u in-charge ka Tripura Congress, u Dr Ajoy Kumar ula ong ba ka jingpynjari da ka jingsynshar president ha Tripura kala long kaba donkam kyrkieh.
“Katba ki nongialam liang pyrshah ki la ngat ha ki jingshah thombor ha ki kynhun runar, hynrei ki la shah leh shiliang ruh ha ki bor pulit ka jylla bad kiwei pat ki tnat pahara, ong u Ajoy Kumar.
