Shillong, Risaw 27: Ka sorkar Meghalaya ka la mynjur ban shna ia 100 tylli ki jingdonkam ha kylleng ki jaka ban pynsuk ia ki paidbah (Pubic convenience amenities) ha kylleng ka jylla, da kaba pynleit jingmut ha kaba pynbha ia ki jaka ba ki nongjngohkai pyrthei ki sngewtynnad.
Kane ka jingthmu ka wan kum ka jubab ïa ka jingeh kaba la slem bha jong ka jingbym biang ki jingtei bad ki jingdonkam ba kongsan ha ka liang ka jngohkai pyrthei jong ka jylla, ka jingeh kaba la khanglad ïa ka jinglah jong ka Meghalaya ban kiew stet ha ka jingbun ki nongjngohkai pyrthei.
U myntri tnad jngohkai pyrthei bah Paul Lyngdoh haba ban jur ia ka jingdonkam jong kane ka sienjam, u la ong, “Nyngkong eh ngi la lah ban pyniaid iew ia ka nongbah Shillong kum ka jaka wan shangkai pyrthei. Ngi la mynjur mynta kumba 100 tylli ki jingdonkam ha ki paidbah ha kylleng ka Jylla Meghalaya.” Kine ki jingdonkam kin kynthup ïa ki jingdonkam ba kongsan kum ki paiñkhana bad ki jaka buh um dih, kiban pynrung nyngkong ha ka bynta ba nyngkong ha ki jaka ba kongsan.
Haba phaidien, ki surok kiba sniew, ki jaka leit shabar ki bym khuid, ki jingbym biang ki jingbuh dak, bad ka jingwan jong ki nongjngohkai pyrthei bym ithuh ithaw kila long ki jingeh kiba ju jia ha kiba bun ki jaka jngohkai pyrthei ha Meghalaya. Kila don ki jingpyrshang mynshuwa ban weng ia kine ki jingeh bad ka tnad jngohkai pyrthei ka jylla mynta ka shim ia ka lynti ban iatreilang bad ki shnong ki thaw ban leh eiei ia kine ki jingeh.
U bah Paul u la pynbna ba katkum ki jinglong ba dang shen, ka Meghalaya ka la pynkhreh ban ïohi ïa ka jingkiew kaba khraw ha ka jingwan ki nongjngohkai pyrthei. “Ka Shillong mynta ka dei ka jaka bala jied nyngkong eh hapdeng ki nong India, kaba long ka burom kaba khraw ïa ka Jylla Meghalaya. Ngi dei ka jaka ba la jied, bad ha u snem 2025, ki don ki dak ba ngin sa ïohi ïa ka jingkiew kaba 70% ha ka jingwan jngohkai pyrthei,” u la pynpaw.
Kane ka long hadien shisngi ba la pynmih ïa ka “Travel Trends Report” da ka global travel app Skyscanner, kaba la pynpaw ba ka Shillong ka la tam ïa ka Baku, ka nongbah jong ka Azerbaijan, kum ka jaka ba pawnam jong ki nongleit jingleit na India ha une u snem ban wan.
Ban pynneh ia kane, u bah Paul u la ban jur ia ka jingdonkam ban nang pyniaid iew shuh shuh ia ka Shillong kum ka jaka ba pawnam ha ka kam jngohkai.
“Ngi la pynbha ïa ki tourist circuit ha kylleng ka jylla, da kaba sdang na ki jaka ba kongsan kum ka Umiam, Sohra, bad Dawki. Ha kajuh ka por, ngi la pyniadon bynta lang ïa ki samla ha ki sienjam ba ngi la shim ha ki kam jngohkai pyrthei, ki ban sa paw ha ki bnai ban wan ha ki jaka jngohkai pyrthei kiba heh,” u la ong.
Ka sorkar jylla ka buh hakhmat eh ruh ia ki lad pyniasoh sha ki jaka jngohkai pyrthei kiba jngai. “Dang shen ngi la pynbha ïa ka surok ban rung ha Mawthadraishan. Kine ki jingpyrshang kin sa sei soh shen, bad da ka jingkhmih lynti ban pynheh ïa ka Kad Liengsuiñ jong ka Shillong, ka Meghalaya kan sa long kawei na ki jaka jngohkai ban khring ia ki briew na kylleng ki ri ka pyrthei,” bynrap biang u Lyngdoh.
