Imphal, Nailur 23: Ka Manipur Commission for Protection of Child Rights (MCPCR) ka la pynpaw ia ka jingsngewkhia kaba jur halor ka jingshah pyniap u samla pule ba dang 17 snem ka rta na ka shnong Upper Takou kaba hap hapoh Tamenglong District bad ka la dawa ruh ia ka jingtohkit kaba kloi, kaba khlem shah liang bad kaba buh da ka por halor katei ka jingjia.
Katkum ka jingong jong ka Commission, une u khynnah rit u dang leit sha Tamei ha ka por ba u shah thombor ha ka 21 tarik u Nailur, ka la ong ba ia ki jinglong jingman jong katei ka jingjia bad ia kiba donkti dei ban lap lyngba ka jingtohkit kaba biang.
Ka MCPCR ka la ong ba ka jingshah thombor biang biang ïa ki khynnah rit bad ki samla pule ka long kaba “bym lah ban pdiang satia” bad ka long kum ka jingpynkheiñ kaba jur ïa ka hok, ka jingshngaiñ bad ka burom jong ki.
Ka Commission ka la kyntu ia ka sorkar Manipur bad ki bor jong ka ain ban pynkhlain ia ka jingpahara ha ki lynti ba lah ban don jingma kiba ki khynnah skul ki pyndonkam, ha kylleng ki jaka pule bad ha ki shnong ba ki khynnah ki lah ban don ha ka jingma.
Ka la khot ruh ia ka jingiatreilang kaba kham bha hapdeng ki bor synshar district, ki pulit, ki jaka pule bad ki bor synshar shnong ban ithuh ia ki jingma bad ban pynthikna ba ki khynnah kim donkam ban iaid lyngba ki jaka ki bym shngain khlem ka jingiada kaba biang.
Ka MCPCR ka la pan ban ithuh bad ban kem ia kiba donkti bad ban pynngat ha ki kyndon katkum ka ain.Ka la kyntu ruh ïa ki bor ba dei peit ba kin pynbiang ïa ki jingïarap (ex-gratia) kiba biang bad kiwei kiwei ki lad jingïarap sha kane ka longïing kaba la duh noh.
La bthah ia ki bor pyniaid district jong ka Tamenglong bad ki pulit ban ai ia ka Action Taken Report hapoh 15 sngi, kaba batai bniah ia ka jingtohkit, ka jingpynngat case, ki jingiarap ba la ai sha katei ka iing bad ki lad ki lynti ba la shim ban kyntiew ia ka jingshngain jong ki khynnah rit ha ki jaka ba don jingma.
Ka Commission ka la kyrpad ruh ïa ki kynhun kieng atiar bad baroh ki liang kiba donkti ha ki jingïakynad ba kin sangeh noh mardor ïa ka jing thombor pyrshah ïa ki khynnah rit, ki samla pule bad ki kynthei, da kaba ban jur ba ki khynnah kim dei satia ban long ki lang knia ha ki jingïakynad khlem da kheiñ ïa ka shnong ka thaw, ka jinglong ne ka jaka ba ki don.
