Shillong, Nailur 23 : U Myntri Rangbah Conrad K Sangma ha ka sngi Balang ula ong ba un dei u briew uba kmen eh lada ia ka ktien Khasi bad Garo la pynrung ha ka Khyrnit ba Phra ka Riti Synshar, kam pher mano ba iakren bad ka Sorkar Pdeng, namar kan dei ka jingjop na ka bynta u paidbah jong ka Jylla.
Haba kynthoh ia ki jingai jingmut ba ki 8 ngut ki MLA ka UDP kiba iasoh sha ka BJP ki pyrshang ban kam burom namar ka jingkyntur ia ka jingdawa ban pynrung ia ka Ktien Khasi bad Garo bad pynbeit ia ki jingeh ha ka kam tih dewiong, u Conrad ula ong ba ka jingpynleit jingmut ka dei ban long halor ka jingkynjoh ia ka thong.
“Ka long kaba bakla ban pyrkhat ia ka kum ka jingai burom. Kaei kaba kongsan ka long ban kynjoh ia ka thong. Baroh baroh ki don la ka jong ka bynta. Ia mynta, ngim tip kaei ka nongrim jong ka Sorkar India, la kan pynrung ne em ia ka ktien. Lada ka urlong, kan ym dei ka BJP lane NPP, hynrei ka dei ka jingjop jong u paidbah ka Meghalaya” ula ong.
U Conrad ula ong ba um kwah satia ia ka jingpaw nam hynrei kaba kongsan ka long ban shem ia ka lynti ban pynurlong. “Lada lah ban shem ia ka lynti ban pynbeit ia ki jingeh, kane kan kham pynkmen bad pynhun ia nga ban ia ka jingkwah ban pawnam”.
Halor ka kam tih dewiong, u Myntri Rangbah ula ong ba ka Jylla kala jam sahkhmat hadien ka hukum jong ka Supreme Court u snem 2019, hynrei ki jingtynjuh ki dang iai don haduh mynta.
“Ngi la iakhun ia ka mukotduma ha u 2019 bad ka Supreme Court kala ai ia ka hukum ban weng noh ia ka jingkhang tih dewiong,hynrei ha ryngkat ka kyndon ba kiei kiei baroh ki dei ban iaid ha ka rukom kat kum ka jingstad saian haba bud ryntih ruh ia ka MMDR Act. Ban jam shakhmat kat kum ka MMDR Act, ngi hap ban bud ia katto katne ki kyndon- ka jaka ba 100 hectare, jingstad par da ka jingstad saian, jingtih open cast bad kiwei kiwei” ula ong.
“Namar ka rukom shong jong u dewiong hangne, kam long kaba suk ia kiba bun ki nongtih par ban jam shakhmat. Ngi la don saw tylli ki par kiba treikam ia mynta. Kumta, ngi la jam shakhmat” ula ong.
