Shillong, Nailur 23 : Hadien ka jingtreikam ba 45 snem na ka Iing ba shipor, ka Meghalaya Board of School Education (MBoSE) Shillong Regional Office kan sa ioh noh iala ka jong ka Ophis ba shirta.
U Myntri Rangbah ka Jylla Conrad K Sangma ha ka sngi Balang, ula buh ia u maw nongrim ban tei ia ka Regional Office ba thymmai ha phyllaw ka Tnad Education ha Laitumkhrah, kaba pyni ia ka jingpynbun ia ki jingtei kiba iadei bad ka pule puthi hapoh ka Jylla.
U Conrad ula ong ba kane ka Ophis thymmai kan pynkhlain ia ka jingtreikam jong ka MBoSE bad kan ai ia ka jingkyrshan kaba khraw ia ka kam pule puthi jong ka Jylla.
“Ka jingpynleit jigmut jong ngi ha ka kam pule puthi ka iaid palat ia ka jingtei” ong u Myntri Rangbah haba kdew ia ki sien jam bala shim da ka Sorkar ba kynthup ia ka Mission Education, Mission School, CM IMPACT, digital learning bad kiwei kiwei ki kam ki ban pynbha ia ki jingmih na ki eksamin bapher bapher.
Ula ong ba ka Sorkar kala shim ia ka lynti jam kawei hadien kawei ban pynkhlain ia ka pule puthi bad plie ia ki lad ba kham bha na ka bynta ki khynnah pule.
Kane ka Regional Office ba thymmai la khmih lynti ba kan pynkhlain ia ka jingtreikam ka MBoSE ha Shillong bad ai ia ka jaka treikam ba long laitlid hadien phew snem ba treikam na ka iing ba shipor.
