Shillong, Naailur 23 : U Myntri Rangbah ka Jylla Conrad K Sangma ha ka sngi Balang ula ong ba ka jingiasoh ki 8 ngut ki MLA ka UDP sha ka BJP kan ym don jingktah ia ka Sorkar MDA ba ialam da ka NPP bad pynpaw ba ka BJP kam pat pan satia ban pynbun ia ka shuki hapoh ka Kynhun Myntri.
Haba iakren bad ki nongthoh khubor hadien ka jingiasoh ki MLA ka UDP ba kyntiew ia ka jingdon MLA ka BJP sha ka10 ngut, u Conrad ula ong ba kane ka kam ka dei hapdeng ki artylli ki seng sain pyrthei.
“Ka dei ka rai hapdeng ki artylli ki seng sain pyrthei. Ka dei ka rai jong ki MLA shimet. Kam don bynta eiei ruh em bad ka NPP. Kumta, ngam don eiei ban kynthoh ia kane” ula ong.
Ula pynpaw ba ka jingdon paid jong ka Sorkar MDA ka dang iai long kajuh namar ki MLA kiba kynthih seng ki dei hi napoh ka kynhun synrop.
“Ka jingdon paid jong ka kynhun synrop ka dang iai long hi kajuh namar ka jingiakynthih seng ka jia tang hapoh ka kynhun, kumta kam pynthut eiei ruh em ia ka jingtreikam ka Sorkar. Lada long kumno kumno ruh, ngi dang don ia ka jingbun paid eh hapoh ka IIngdorbar bad ngi sngewskhem ba baroh kiei kiei kin long kumba ju long” ong u Conrad.
Hynrei u Conrad ula kubur ba ka lah ban mih ka jingsngewkhia hapdeng ka UDP bad ka BJP.
“Kin don hi ki jingsngewkhia hapdeng ki artylli ki seng sain pyrthei namar ki MLA na kawei ka seng kila mih bad leit iasoh sha kawei pat. Balei ba ki leit rung bad kaei ka jingthmu, kata hi ka dei kaei kaei kaba ngam lah ban kynthoh” ula bynrap.
Halor ka jingbujli shuki Myntri, u Conrad ula kren shai “Nga la dep kren shai bha, kane kan ym ktah eiei ruh em”.
Haba kylli lada ka BJP ka pan kham bun ka shuki Myntri, ula jubab “Em, kim shym la pan eiei ruh em”.
Haba kylli la kane ka jingkiew kynrdan ka BJP kan buh jingma ia ka jinglong nongialam jong u hadien habud, u Conrad ula ong “Em, kam don jingma satia ia mynta. Man ki seng sain pyrthei ki kwah ban kiew. Ha ka synshar paidbah, man ki party ki don ka jingangnud-ngi angnud ban iew ha man ki Jylla. Ngi la trei shitom ha Manipur bad kiwei ki Jylla. Kane ka dei kaba ju long beit kumne”.
