Ap shwa ia ka lynti rel | Pynioh shwa mardor ia ka Inner Line Permit : sawa jam ka sur na ka KSU

Pyntreikam pura ruh ia ka MRSSA 2016

Shillong, Risaw 26 : Ka Khasi Students’ Union (KSU) kala dawa ia ka Sorkar Jylla ban pynsangeh shuwa ia ka jingthmu ban wanrah ia ka lynti rel ha Ri-lum Khasi Jaintia bad dawa ba dei ban pynioh shwa mardor ia ka Inner Line Permit (ILP) bad ban pyntreikam pusa ruh ia ka Meghalaya Residents Safety & Security Act, 2016.

U General Secretary ka KSU samla Donald V Thabah ula ong “Ka KSU kam lah ban shu sngap jar ia ki khubor ba mih ha ki khyndiat sngi halor ka jingthrang ki katto katne tylli ki kynhun ban pynpoi noh ia ka lynti rel ym tang ha Byrnihat hynrei shaduh Shillong”.

“Ka KSU kam lah ruh ban shu sngap ia ka jingbym kren shai ka Sorkar ban pynsangeh shwa shipor ia ka jingthmu ban pynpoi lynti rel sha ka Bri U Hynniewtrep tad haduh ban da ioh ki ain kiba khlain bor ban the lakam ia ka jingwan bushai shnong pathar ki bar jylla bad mynder ri hapoh ka Jylla” ula ong.

Une u Nongialam ka kSU ula pynshai ba ka jingpyrshah ka KSU ban pynpoi lynti rel kam dei namar ba ka pyrshah ia ka roi ka par hynrei ka sngewthuh shai ba lad aka rel kan wan, kan pynsuk arshah ia ki briew nabar ban rung ban mih katba mon ha Jylla.

“Kane kan plie lad ia ki ba kin buhai shnong ha Ri-Khasi katba mon namar bay m don ain ne kyndon ban khanglad ia ki ban seng longiing hapoh u pud u sam ka Jylla” ula ong.

Haba pynkynmaw ia ki paidbah ka Bri U Hynniewtrep halor ki jingkynad ba jia khah khah hapdeng ki Khasi bad ki bar jylla naduh u snem 1979 ter ter haduh mynta, u samla Donald ula ong “Kine ki jia dei namar ba ki nongwei kila leh trai khlieh bad thombor ia ki paid Khasi. Ka jingbun paid ki nongwei ha ka Bri U Hynñiewtrep ka pynshong syier ia ki Khasi namar kine ki poiei kila knieh ia ka khaii ka pateng, kila shongkha pathar ia ki thei Khasi, kila klun ia ki jaka sorkar bad wat ki jaka shnong bad ruh kila ioh wat ban long nongmihkhmat ha ka iingdorbar thawaiñ. Ka jingknieh noh ka jong kine ki nongwei ia ka hok bad ka iktiar u Khasi ka pynlong ia ki ban sngewmeng bad leh donbor ia ki paid Khasi wat ban shoh ban dat bad ruh haduh ban shim ia ka jingim”.

Ka KSU ka pynkynmaw ruh ia ki kynhun kwah lynti rel bad ia ka Sorkar ia kaei kaba la jia ha u snem 1989 bad kumjuh ha u snem 2017 ha kaba ka KSU bad ki paidbah kila iakhun dohiap pyrshah ia ka jingthmu ka Sorkar ban wanrah lynti rel ha Byrnihat.

Ula ong “ Ka KSU naduh mynshwa ka pynsngew sha ka sorkar ba tad haduh ynda la ioh ki aiñ kiba khlaiñ ban teh lakam ia ka jingbuhai shnong ki nongwei ha ka Bri U Hynñiewtrep kum ka ILP, ka MRSSA, ka Cut-off Year 25 tarik u Lber 1971 ban kheiñ nongshong shnong ba pura ka Meghalaya bad kiwei kiwei, kan ym ailad horkit hordang ia ka rel ba kan wan ksam lyngba sha ka Bri U Hynñiewtrep”.

“Ka KSU ka pynpaw ia ka jingsngew lyngngoh haba ki mih ki briew lane ki kynhun kiba ong ba lada wanrah ia ka ILP ha jylla, ki nongshong shnong ka jylla kin sa duk bad iap thngan bad kumjuh ruh ka jylla kan sa hiar arsut ha ka roi ka par bad ka duk sohsat. Hynrei lada peit pat ia ki jingshisha yn shem ba ki nongshong shnong ka Meghalaya ka bym don ILP ki duk haduh katta katta bad yn shem ruh ba ki briew kiba shong ba sah ha ki jylla ba don ILP kum ka Arunachal Pradesh, Mizoram bad Nagaland ki kham bit kham biang ban ia ki nong Meghalaya ha kaba ka kamai kajih ka jongki ka kham heh ban ia ki nong Meghalaya” ong u samla Donald.

“Lada ia nujor ia ka Per Capita Income, yn shem ba ki nongshong jong ki jylla ba don ILP ki kham heh ban ia ki nongshong shnong ka Meghalaya ba khlem ILP. Ka per capita income jong ki nong Mizoram kadei 2,15,144 tyngka ha u snem 2022-2023, jong ki nong Arunachal Pradesh ka dei 1,99,992 tyngka ha u juh u snem bad jong ki nong Nagaland kadei 1,45,537 tyngka. Katba ka per capita income jong ki nong Meghalaya ka kham rit ban ia jong kitei haneng ha kaba ka poi tang 1,23,896 tyngka ha u snem 2022-2023. Kane ka pyni ba ka ILP kam dei ka aiñ ban pynduk ia ki briew hynrei kadei ka aiñ ban iada ia ki rit paid ha la ka jylla. Ka jingshisha lei ka paw shai ba ki briew ha Meghalaya ki dei kiba duk tam ha ka thaiñ shatei lam mihngi ha kaba ka jingioh jingkot ka jong ki ka shah tam kput ha ki briew ba sah ha ki jylla ba don ILP. Lada kren ha ka liang ka lynti rel, ka Mizoram bad ka Manipur ruh kim don lynti rel hynrei sngew lyngngoh ba kham tad ki marbam ha kine ki ar jylla ban ha Meghalaya wat la ka Meghalaya ka jan lai shah na Guwahati lada ianujor bad kitei ki jylla. Haba kumne yn kynnoh ia ka jyngbym don lynti rel, ne ia ka jingjngai na Guwahati ne ia kito ki heh saipan kiba synshar bad rai ia ka dor ka mur ki mar ki mata ha jylla jong ngi?” La buh jingkylli u nongialam ka KSU.

Nalor kane, une u Nongialam ka KSU ula ong “Kumjuh ruh ki riew ia shah mynder ki ju ong ba ka ILP kan pynhiar ia ka kam jngohkai pyrthei hynrei lada ianujor bad ka jingwan ki Tourists hapdeng ka jylla Meghalaya (bym don ILP) bad ka jylla Arunachal Pradesh (kaba don ILP) yn shem ba ka duna bha ka jingiapher ha kaba ka jingiapher ka long tang kumba (20-30) hajar kaba pyni shai kdar ba ki Tourists ki leit beit sha Arunachal Pradesh wat lada ka don ka ILP”.

Ka KSU ka kyntu ia ka sorkar bad ka MTDF ba kin sangeh shwa ka phohsniew ia kata ka High Speed Luxury Rail Network hynrei pynleit jingmut noh noh ha ka ban pynbor ia ka sorkar India ban pyntreikam noh ia ka ILP ha Meghalaya bad kumjuh ruh ban wad ki lad ki lynti kumno ban kyntiew ia ka ioh ka kot, ka pule ka puthi, ki surok ba bha, ki jaka ai jingsumar kiba paka, ka thungkam thungjam kaba khuid, ka jingteh lakam ia u drok bad kiwei kiwei ki kam kyntiew namar ka jylla kam donkam tang kata ka ‘roi ka par’ ha kaba yn roi u nongwei bad par ki trai Ri hynrei ka donkam khamtam ia ka ‘roi ka kiew’ ban roi ka Jaidbynriew bad kiew artet ka jylla.