Shillong, Risaw 25 : U Myntri ka Sorkar Pdeng uba khmih ia ka tnad Textiles Giriraj Singh hynne ka sngi Thohdieng ula batai ia ka thong jong u na ka bynta ka lawei jong ka kam pynmih jain jong ka ri India bad ban jur ïa ka jingdonkam ban sei ia ki buit thymmai bad ka bynta jong ka thaiñ Shatei Lam Mihngi ha ka kam pynmih jain.
U Myntri ula pynpaw ia ka jingsynniang kaba khraw jong ka thain shatei lammihngi ha kaba iadei bad ka jingpynmih jain haba kdew ba ki jaiñ thain kti, ki jaiñ bala pynwandur , bad ki tiar shna kti ki dei kiba lah ban shalan palat T 45,000 klur shabar ri.
“Ka thaiñ shatei lammihngi ka don ia ka bynta kaba kongsan ha ka ïew kaba poi da ki klur tyngka,” u la ong, da kaba pynskhem ïa ka jingmut ba ka thaiñ ka long kaba donkam bha na ka bynta ka jingithuh jong ka tnad.
U Myntri ka Sorkar Pdeng ula kren ia katei ha ka jingplie ia ka jaka pule bathymmai jongka National Institute of Fashion Technology (NIFT) bad iaka 12th Convocation Ceremony kaba la long hynne ka sngi.
“Mynta ka sngi ka long ka sngi kaba kongsan bha ia ka NIFT Shillong, ha kaba ngim shym la plie tang ia ka jaka pule ba thymmai hynrei ban rakhe ruh ia ka jingtrei shitom kaba la bun snem jong ki samla pule. Ka jingiaid lynti ka jong phi kan ym kut tang hangne, hynrei kan dang sdang. Pdiang ia ki jingeh kiba phin iakynduh nangne shakhmat bad trei shitom ban leh ia kiei kiei kiba long thymmai bad ban ai mynsiem, ka lawei jong ka Fashion kan shong ha ki kti ki jong phi” ong u Giriraj.
Nalor kane, ula banjur ia ka jingdonkam ban don ia ki kor teknoloji ha kaban pynwandur ne design bad ula ong, “Lada ki samla pule jong ngi ki shna ia ki design kiba itynnad lyngba ka jingtrei shitom, ngi dei ban pynkup bor ia ki da ki tiar bad ki kor teknoloji ban iada iaka jingstad bad jingshemphang ka jongki”.
“Ngan rah shajrong ia kane ka tnad sha kata ka kyrdan ka ban ioh ia ka jingithuh ha kylleng ka ri ka pyrthei” ula ong.
Ula pynkynmaw ruh ia ka jingiakren ka jong u bad u Myntri Rangbah duh ka ri u Narendra Modi, ba hadien jong ka rep ka riang, kawei na ki lad kaba lah ban aikam aijam ka dei lyngba ka Textile.
U Giriraj Singh ula ong ba ki karkhana Texitile ha India kadei kaba la khmih lynti ba kin kiew sha ka 350 billion US Dollar ha u snem 2030 kaban aikam aijam da ki klur ha katei ka bynta.
Ula pynpaw ruh ia ka jingkongsan ban pyniasohlang ia ka Artificial Intelligence (AI) ha ka jingpynwan ia ki Design bad na ka liang u Myntri Rangbah duh u ngeit ba ka design ka wan hakhmat ban ia kiwei pat, khamtam eh iaka Fashion kaban long ka jingkhlain.
U Singh ula iaroh ruh ia ka VisionNxt, kaba dei ka sienjam kaba la sdang da ka NIFT bad ong “Ngim donkam ban shaniah ha kiwei pat ki ri” haba pynbna ia ka jingthmu ban tei ia ka NIFT campus shabar jong ka ri India.
Ula pynpaw ia ka jingkyrmen ia ka ri India ba kala ioh ia ka jingithuh kum ka Bharat bad ki mar Texitile kiba neh ha ka rynsan jong ka pyrthei.
Ula kyntu ia ki samla pule da kaba ong, “Lada phi trei ha kano kano ka kompani, rah lang ia ka nam Bharat bad phi shano shano ruh shaba phi leit”.
Ha katei ka prokram la wan ban iashimbynta lang u Pabitra Margherita u Myntri Khynnah uba khmih ia ka External Affairs bad Textiles, u Myntri ka sorkar jylla uba khmih ia ka Texitiles u Bah Paul Lyngdoh, ki ophisar jong ka sorkar pdeng bad ka sorkar jylla.
