Shillong, Risaw 16: Ki nonghikai SSA hapoh ka shatri All Meghalaya SSA School Teachers’ Association (AMSSASTA) kiba dang don hapdeng ka jingiakhih, ki la pan jingïarap na u Vice President ka Ri India u Jagdeep Dhankhar halor ka jingdawa jong ki ban pynkiew ia ka tulop ki Nonghikai SSA ba 100%.
Ki Nonghikai SSA kila pynlong ia ka jingiakhih da kaba shongkyllain mungor kaba la iaid mynta sha ka sngi ba 16.
Ha ka dorkhas sha Vice President ka Ri India u Jagdeep Dhankhar, u President ka AMSSASTA, Bah Peter Thyrniang u la ong, “(Ngi) kyrpad ia phi ban tuklar kloi ha kaba ïadei bad ka jingpynkiew ïa ka tulop jong ki nonghikai Samagra Shiksha Abhiyan.”
U Bah Peter u la pyntip ba watla ka seng kala aiti ïa ki dorkhas bapher bapher halor kane ka kam naduh u snem 2019 hynrei kam shym la don satia kano kano ka jubab na ka Sorkar jylla haduh kine ki sngi.
“Ka la iaid palat 8 snem naduh ba pynkiew ia ka tulop jong ngi. Naduh ba la pyntreikam ia ka skhim SSA ha Meghalaya, ka tulop jong ki nonghikai ka ju kiew man la ka ar ne saw snem. Ha u snem 2008 la pynkiew ia ka tulop na ka 1,500 sha ka 3,000 (100%), ha u snem 2010 la pynkiew na ka 3,000 sha ka 6,200 (100%), ha u snem 2013 la pynkiew na ka 6,000 sha ka Rs 9,200 naka bynta ki nonghikai LP teachers (53.3%) bad T.9,900 na ka bynta ki nonghikai UP (65%), ha u snem 2016, la pynkiew na ka T.9,200 sha ka T.19,044 (107%) na ka bynta ki nonghikai LP bad T.9,900 sha ka T.20,493 (107%) na ka bynta ki nonghikai UP. Hynrei naduh u snem 2017 haduh u bnai Nailur 2024, ym shym la ai jingpynkiew shuh ia ka tulop” ong u bah Thyrniang.
“Ki ar tylli ki jingdawa ba kongsan jong ngi ki long, ka jingpynkiew tulop bad ka jingthung kam pura noh ka Sorkar ïa ka kam jong ngi. Ka seng ka la jied ia ka jingpynkiew ia ka tulop namar ba ka dei ka jingdonkam jong ka por bad na ka bynta ka jingim jong ngi ha kane ka por ba jur bha ka jingkiew dor ha kaba ngi ki nonghikai SSA ngi ialeh ban pyndap ia ki jingdonkam jong ka iing ka sem jong ngi bad ki khun jong ngi kiba wad ia ka jingpule kiba kham shalor. Ka Central Executive Committee kaba la long ha ka 7 tarik Nailur ha Nongstoin, ka la rai da kawei ka sur ban dawa shispah na ka shispah ka jingpynkiew tulop kum ka jingdawa ba hakhmat eh jong ngi” u la bynrap.
