Shillong, Risaw 14: Ka Sorkar Meghalaya kala pan ia ka jingiarap song pisa ba T.600 klur na ka Sorkar Pdeng ban pynkhlain bad pynjanai ia ka jingtreikam nadong hadong jong ka Tnad Social Welfare.
Haba pyntip ia kane ha ka sngi Nyngkong, u Myntri ba khmih ia ka Tnad Bah Paul Lyngdoh ula pyntip ba ula dep shong jingialang bishar kam halor ka jingtreikam bad ka jingdon pisa jong ka Directorate lem bad ki kam ba ka trei kiba donkam ban leh da ka Jylla.
“Ki don katto katne ki kam kiba hap ban iakren hapoh ka Cabinet. Ki don ki katto katne ki kam kiba hap ban iakren bad ki 5 tylli ki Ministries ka Sorkar Pdeng ba iadei kam bad ka Tnad jong ngi hangne ha Meghalaya” ula ong.
“Kiwei pat ki prokram kin kynthup ia ka jingioh pisa shuh shuh na ka Ministry. Ngi la buh ia ka jingtyrwa ia ka song pisa ba kot T.600 klur. Ki don ruh ki jingdonkam ia ngi ban pynbiang ia ka rukom treikam jong ki nongtrei hangne. Kiba bun kila trei kum ki nongtrei contract bad ki hap ban trei shitom bha. Ki hap ban shong miet, kito kiba hap trei mynmiet. Ngin pyrshang ban pynbiang ia ki jingdonkam na ka bynta jong ki khnang ba kin lah ban trei kham bha ia ka kam” ong u Bah Paul.
U Myntri ula shong bishar kam ruh halor ka jingtreikam jong ka Women and Child Helpline ha ka Ophis jong ka Directorate of Social Welfare.
“Kumba phi iohi daade, ngi don bun ki samla kynthei bad shynrang kiba tip bha shaphang ki technology bad khmih ia ki case manla ka sngi, ki case ba ujor ha ki Child Helpline bad Women Helpline ha kaba ki don 3 ngut ki nongtrei ba khmih bad iabujli kam ha man ka 8 kynta” ula ong.
U Bah Paul ula pynpaw ruh ia ka jingkmen ban iohi ia ka jingtreikam bha jong ka child helpline cell bad ong “Nga shem ba ka jingjop ha ka jingtreikam ka long kumba 90% ki case bala pynbeit nalor ka jingthep ia baroh ki jingtip ba wan na ki District ha ka dashboard baroh arphew saw kynta ka ban iasoh lang sha ka Ophis jong nga ha Secretariat”.
