Shillong, Risaw 11: Ka jylla ha ka 11 tarik u Risaw kan ioh ban sakhi ia ka lawei jong ki khlur kiban sa mihkhmat kum ki rangialehkai phutbol kiba kynsai na ka bynta ka jylla, ha kaba kin pyni iaka sap ka jongki lyngba ka phainal jong ki artylli ki rta ialehkai katta ka U-14 bad ka U-16 Meghalaya Youth League, kaba la pyniaid ia ka da ka Meghalaya Football Association bad kyrshan da ka Directorate of Sports & Youth Affairs.
Ia ki phainal kane ka lympung yn pynlong ha SSA Stadium First Ground Polo
Ki artylli ki district kiba la rung sha ka phainal jong ka U-14 kaban sdang ha ka por 11 baje mynstep ki long ka West Jaintia District Sports Association pyrshah ia ka Nongstoiñ District Sports Association.
Katba ka phainal jong ka U-16 kaban long ha ka por 2 baje nohphai sngi, hapdeng jong ka Shillong Sports Association bad ka Ri-Bhoi District Sports Association.
Haba kyrtiang dien sha kane ka lympung kadei kaba la mih na ka jingpyrkhat kaba sani bad ba da janai bha ki nongkitkam kiba mynta jongka Meghalaya Football Association (MFA), ha kaba ki la shim ia ka rai ban pynlong ia kane ka lympung da kaba shimkhia ba kan da ioh ruh ia ka jaka ba kan da rung ne ban pynialehkai ha man la ki dong bad ki kyntoit kiba don hangne ha ka jylla, da kumta la saindur pat ia kane ka lympung ha ki saw tylli ki Zone, ha kaba ia ki jingialehkai baroh la ialeh ban pynlong tang ha ki sngi ba ki khynnah ki ioh shuti kham bun dei ki sngi Saitjain.
Dei ha ki jingiakhun kiba shakhmat jong kane ka lympung ba ka district kaba ki khynnah ki la paw bad kham tyngshain bha dei ka West Jaintia, kiba la pynpaw ia ka jingtbit bd ba da pnah bha ka jong ki ha ka jingiakhun ka Zone B, da kaba kila lah ban jop ia baroh ki phra kylla jong ka round robin, ha kaba kila lah ban pynliem pat ia ka Pyndengumiong District Sports Association lyngba ka Tie Breaker ha ka Quarterfinal bad ban tan biang sha ka Tie Breaker ha ka jingiakhun pyrshah ia ka Shillong Sports Association ha ka Semifinal.
Nalor katta, ka kynhun ialehkai ka Nongstoiñ DSA ki long ki nam tam ha ka jingiakhun ia ka Zone D hadien ba kila lah ban jop ia ki 7 tylli ki jingiakhun bad ban iakhaid 2 sien bad shah rem shisien na ki 10 sien iakhun, ha ka Quarterfinal, ki khynnah ka Nongstoiñ DSA kila hap ban kham trei shitom ban pynliem ia ki khynnah jong ka Amlarem Block Sports Association, kaba la kynjoh sha ka Extra Time kaba long da 3-2, bad ha ka Semifinal ki la lah pat ban pynliem noh ia ka Ri-Bhoi DSA da 1-0.
Haba phai sha ka U-16, ka kynhun ka Shillong SA bad ka Ri-Bhoi ki la dep ba kin ia aireng teng hapdeng para ma ki ha ka round robin, ha kaba kine ki ar kynhun la pyniahap ia ki ha ka Zone C bad na kane ka Zone, ka kynhun kaba bat ia ka kyrdan ba halor duh dei ka Ri-Bhoi DSA hadien ba kala ioh ba kan khur 20 point bad ka Shillong SA 19 point.
Ha ka jingiakhun ia ki Quarterfinal ka Ri-Bhoi DDSA kila lah ban pynliem ia ka North Garo Hills District Sports Association da 5-2 bad ban bynrap da ka jingjop kaba long da 3-2 ha ka Semifinal ia ka Nongstoiñ DSA.
Katba ka Shillong SA kila lah ban pynliem da 2-0 ia ka Williamnagar District Sports Association ha ka Quarterfinal bad da 4-1 ia ka West Jaintia DDSA ha ka Semifinal.
