Nongstoiñ, Risaw 08: U Myntri Rangbah ka Jylla Conrad K Sangma hynne ka sngi Ba-ar, u la lum ia ki bor pynïaid District jong ka South Garo Hills ha Dimapara ban bishar kam halor ki lad jingïarap bad ban jurip ïa ki jingjulor na ka jingshlei um bad ka jingtwa khyndew hapoh ka District.
Haduh 40 tylli ki shnong ki la shah ktah ha ki 3 tylli ki block na ki jingshah pynjulor ha ka mariang, kaba la ktah ïa palat 2510 ngut ki briew na ki 462 tylli ki longïing.
Hynniew ngut ki briew kiba dei na kawei ka longing, ki la shah tep im ha ka jingtwa khyndew kaba la rong noh ïa ka ïing ka sem jong ki ha ka shnong Atisia Songmong kaba hap hapoh Gasuapara.
U Myntri Rangbah u la ban jur halor ka jingdonkam ban don ki lad jingiada na ka jingshlei um bad ka jingjurip ia ka jingshlei um ban iada na ka jingduhnoh ia ki mynsiem bad ki mar ki mata kiba kordor.
U Conrad u la bthah ruh ïa ki heh Sorkar ban pynkloi iaki kam maramot ba kongsan bad ban pynthikna ïa baroh ki lad jingïarap sha ki nongshong shnong kiba shah ktah.
Na Dimapara, u Myntri Rangbah u la leit sha ka shnong Atisia Songmong ha ka ba u la iaid kjat kumba 2 km ban poi sha katei ka jaka ba jia katei ka jingjia ba sngewsih.
U Myntri Rangbah u la aiti ïa ka jingiarap song pisa shaki 5 ngut na ki 7 ngut lo lanot na kajuh ka longïing sha u Watison Marak bad na ka bynta ki 2 ngut sha u Baseng Momin, u ba la duh noh ïa la ka kurim bad ïa u khun shynrang ba dang shisnem shiteng.
U Conrad u la iashim bynta ruh ha ka jingduwai kaba la pynlong na ka bynta ki lanot ha katei ka shnong bad u la shong ban shah skhor ruh ia ki jingud jingnam jong ki paidbah.
U la kular ba ka Sorkar kan pynthikna ba ka jingpynbha ia ki surok bad ka bording kan long kaba sted.
