Shillong Nailar 24: Ka MLP FT ryngkat ka mynsiem iakhun ba rhem bha, ka la lah pat ba kan pynliem ia ka Sawmer SC da 4-2, ha ka lympung ialehkai jong ka Shillong Premier League 2026, ka Shillong Sports Association ba long hynne ka nohphai sngi Nyngkong ha SSA Stadium, Polo.
Haba phai sha ka jingthep ia ki kol, na ka bynta ka Sawmer SC, ia ki kol ki jong ka, kidei kiba la thep da u Diego Khyriem (2’) bad Banteilang Lyngdoh (11’) katba na ka liang ka MLP FT, ia ki kol ki jong ka, la thep da u Pynshaidor Nongrang (5’), Rapborlang Marwein (15’), Bikram Chettri (67’) bad Pynshailang L Lyngkhoi (84’).
Kine ki ar kynhun ki rung sha kane ka jingiakhun hadien ka jinglah ban khur ia ki nam jop, ha kaba ka Sawmer SC ka la lah ban jop da 2-1 ia ka Rangdajied United FC, katba na ka MLP FT kala pynliem ia ka Langsning FC.
Ki jingkylla ha kane ka sngi jong ka jingiakhun, ka MLP FT ka la shaniah skhem ha ka juh ka kynhun, kaba la khur ia ka jingjop, katba ka Sawmer SC kala wanrah thymmai ia lai ngut ki rang ialehkai u Diego A Khyriem, Enestar Malngiang bad u Michaelson Kurbah kiba la mih ha ka jaka ka jong u Oresterwell Langshiang, Andy Z Mawthoh bad Wanshanlang Dkhar.
Ka jingiakhun hi ka long ba marsien ia sdang katta haduh 15 minit eiei, la iohi ia ka jingkhih kaba haduh saw sien ka jar, ha kaba ki ar kynhun ki la iakhun tyngeh ban ia thep marbud ia ki kol, bad ka kylla step hi kala kut da ka jingiakhaid da mar ar kol.
Haba wan bteng ia ka kylla miet, ka MLP ka ba dang dap bha ka ktang lyer, ka la sdang ban nion shakhmat ha ka rukom ialehkai bad ka la pynlong ia ka kynhun ialehkai ka Sawmer SC ba kan hap ban kham randien ka rukom ialehkai kabala pynioh ia ka MLP FT ban thep sa ia ki ar kol kiba sah bad ioh ia ka lai point na kane ka jingiakhun.
Lashai pat ka sngi, ka Laitkor SC kan mih madan ban iakhun pyrshah ia ka Nangkiew Irat bad kane ka jingiakhun kan long ha ka por 3:40 baje nohphai sngi.
