Shillong, Nailur 28: U MLA ka South Shillong Constituency u Bah Sanbor Shullai ula bthah ia u Chief Executive Officer, ka Shillong Cantonment Board ban lum ia ka jingialang ha ka 2 tarik u Risaw ban iakren ha kaba iadei bad ki jingjia jong ka jingkhaii droks.
“Ha kaba ïadei bad ka khubor ba la pynmih ha ki lad pathai khubor, nga wanrah ha ka jingtip jong phi, ba ha ka 25 tarik u Nailur kawei ka nongkhaii drok ba pawnam ka Aisa Khatoon kala shah kem na Lower Paltan Bazar, Shillong Cantonment Area bad ka la long ka dawbah jong ka jingkulmar ha katei ka jaka ha kine ki katto katne snem kiba la dep” la pyntip u Bah Sanbor ia u Chief Executive Officer, ka Shillong Cantonment Board.
Ula pyntip ba halor katei ka jingjia, kumta yn pynlong ïa ka jingïalang bad ka tnad pulit ha ryngkat bad baroh kiba bad ki nongshim wai ia ka jaka jongka Shillong Cantonment Board ha ka 2 tarik u Risaw, ha ka por 12 baje mynsngi ha Jhalupara Community Hall.
“Ka matban iakren ha katei ka jingialang ka long ban wanrah ha ka jingtip ia ki nongshim wai iaka jaka bad ia baroh kiba donynta jong ka Shillong Cantonment Board, ba kino kino ki bym shong bymsah bad ki bym dei ki nongshong shnong ba shisha jong ka jylla kidei ban don ia baroh ki kot ki sla kiba donkam kynthup ia ka jingpynshisha na ki pulit na ka jylla ba ki wan lem kumta y ym shah ia ki ban sah ha kitei ki shnong namar katei ka kam kaba iadei bad ka jingwan buhai shnong be-aiñ ka buh ha ka jingma kaba khraw ia ka imlang sahlang kynthup ia ka ri” la pynpaw u Bah Sanbor Shullai.
U Bah Sanbor ula pynpaw ruh haka shithi,da kaba ong, “U Myntri Kam Pohiing jong ka Sorkar Pdeng jong ngi u Amit Shah ula dep pynpaw ba dei ban leh da kaba tyngeh pyrshah ia ki nongkhaii drok bad ki mynder ri be-aiñ. Halor katei ka bynta kino kino ki nongshim wai ha ka thain Paltan kidei ban ioh iaka jingpyntip ia katei bad lada jia ba kim lah ban kohnguh, dei ban leh da kaba tyngeh ia ki. Kito ki trai kiba ai jaka rieh tngen ia kum kine ki riewsniew ruh dei ban pynngat lang ka kyum ki kyndon aiñ”.
