Shillong, Nailur 27 : Ka Deputy Commissioner ka East Khasi Hills Kong RM Kurbah, kala pynjari da ka kyndon 163 BNSS ha Nongbah Shillong, kaba khang ia kynhun ki shitniam Hindu ban pynlong ia ka Yatra ban ialap khang bam doh masi ha Shillong.
Kane ka hukum kala mih ruh shisngi hashuwa ka jingwan iuhkjat jong ka kynhun Hindu Jyotish Peethadheeshwar Shankaracharya Avimukteshwarandah ba ialam da u Jagadguru Shankaracharya, ban wan sha kane ka rally bala pynbna ban long ha ka 2 tarik Risaw.
U National Media In-Charge ka kynhun Jagatguru Shankaracharya Maharaj u Shailendra Yogi Sarkar ula pyntip ba u Nongialam ka kynhun, u Shankaracharya, un wanpoi sha Shillong haka 28 tarik mynta u bnai lyngba ka Kad Liengsuin ha Umroi.
U pyntip ba u Shankaracharya hadien ba poi ha Shillong Airport, un sa pynher ia ka lama masi hapoh ka Gau Dhwaj Sthapana Bharat Yatra bad ban dawa pynbna ia ka masi kum ka “Kmie ka Ri’ nalor ban pyntreikam ia ka Ain da ka Sorkar Pdeng ban khang noh ia ka jingshoh doh ia ka masi”.
Kat kum ka hukum, ka Deputy Commission kala ong “Ka la poi sha ka jingtip jong kaba soi harum ba katto katne ki Kynhun ki thmu ban pynlong ia ka Gau Dhwaj Sthapana Bharat Yatra ha Shillong ha ka 2 tarik Risaw 2024. Kane ka kynhun kam shym la pan jingbit satia ban pynlong ia ka Yatra. Kum kane ka rally ka lah ban lam sha ka jingkulmar hapoh ka sor Shillong bad ka District baroh kawei”.
Kat kum ka bor bala pynkup hapoh ka kyndon 163 BNSS, ka DC kala khang ban ia iaid ne ialum briew ba 5 ne palat, ban pynlong rally ne procession hapoh ka nongbah Shillong bad ki khapsor.
Kala ong ba ka jingpynkhein ia kane ka hukum kan khang ia ka jingshah pynngat hapoh ka kyndon 223 jong ka BNS bad kiwei kiwei ki kyndon kat kaba I iahap.
Ka pyntip ba kane ka hukum kala treikam mardor tad haduh da pynmih da kawei pat ka hukum.
