Shillong, Nailur 25 : Ka Sorkar Jylla kala thaw ia ka Committee ka ban khmih ia ki kam kiba iadei bad ki kali tourist ba kamai hapoh ka Jylla.
Haba pyntip ia kane ha ka sngi Balang, u Myntri Rangbah Conrad K Sangma ula ong “Nga la bthah ia u Director ka Tourism ban thaw ia ka Committee kaba rit….ba kan bishar ia ki jingdawa ki kali tourist bad ai jingtip ba haduh katno ka ktah ia ki kali tourist, kiei ki jingai jingmut bad ki lynti ban pynbeit kiba don hakhmat jong ngi, katno tylli ki kali tourist ki don bad katno tylli ki kali torist ki wan na shabar”.
Ka Committee kan don ia ki dkhot napoh ka tnad Tourism, Law, Police, District Administration bad kiwei kiwei ki Tnad nalor ki kynhun kiba don bynta lang ha ka kam.
“Ngi kwah ban wanrah ia ka rai, shisien ba ngi la lah ban ioh jingkhein ia ka jinglong jingman ha ka lynti kaba bniah bha bad yn ailad kumjuh ia baroh ki kynhun ba kin pynpaw ia ki jingsngewkhia halor kane ka kam” ula ong.
U Conrad ula pynpaw “Kumba nga ong, ka long kaba donkam ba ki taxi aaociation bad ki nongniah dalade, kin iadonlang ban iakren bad ki, ban tip kiei ki jingeh, kiei ki jingtyrwa, kiei ki lynti ba ngi don hakhmat, kaei ka sienjam ba ngi lah ban shim, kaei ka ban jia lada ngi shim ia kine ki sienjam bad kiwei kiwei”.
“Nga kyrmen ba ka Committee u Director kan sa iakynduh noh shen bad kan sa ai ia ka kaiphod kham kloi sha ngi bad shuwa kane, ngan sa khot ia ki kynhun bapher bapher ban iakren bad ngin peit ia kaei ka lynti ba ngin lah ban shim” ula ong.
