Shillong, Nailur 25 : Ki Seng jong ki jadibynriew Sikh na Punjab, kila wan ban tuklar biang ia ka kam pynkynriah ia ki Harijan na Them Metor, Them Iew Mawlong bad pynpaw ba kim pat hun pura satia ia ka blueprint bala tyrwa da ka Sorkar Jylla.
Kine ki seng ki dei ka Shiromani Gurdwara Parbandhak Committee bad ka Save Shillong Sikh kiba dei na Amritsar, Punjab.
Kane ka jingiakynduh ka dei kaba la long halor ka jingbthah jong ka Sorkar Jylla. La bthah ia u Chief Secretary ban aiti ia ka kaiphod halor ka jingmih na ka jingiakynduh bad kane ka kynhun (halor ka ra jong ki ba iadei bad ka blueprint jong ka Sorkar ban pynkynriah ia ki Longiing) na ka bynta ban shim ia ka rai ba khatduh halor kane ka kam.
Haba iakren bad ki nongthoh khubor, u nongialam ka SGPC Jagmohan Singh ula ong “Ka jingialang ka long kaba tei bha bad ngi kyrmen ba ia ki jingeh jongki nongshongshnong ka Them Metor yn sa lah ban pynbeit noh kham kloi”.
Ula ong ba kane ka kam ka dei kaba sngewkhia bha ia ki namar kine ki jaidbynriew Sikh kila wan 200 snem na Punjab sha Meghalaya bad ka SGPC kala wan ban pynpaw ia ka jingsngewlem bad ki.
“Ngi wan hangne ym ban pynmih ia ki huri hura. Ngi wan hangne ban iarap ia ka Sorkar ba kan pynbeit ia ki jingeh ha ka lynti kaba dei bad ba iasngewthuh lang” ula ong bad bynrap ba ka kynhun kam pat hun pura ia ki jingtyrwa ka Sorkar bad dei namar kata kala pynsngew ia ki katto katne ki jingsngewkhia bad kine kila don hapoh ka jingialang bad yn sa lah ban pynbeit ia ki khnang ban la lah shim ia ka rai kaba biang tam/
Haba kylli, u Jagmohan ula kyntait ban batai ia ki jingmih jong ka jingialang da kaba ong “Kane ka jingialang ka dei shibynta jong ka jingiakren ba dang iaid. Ngi la pynsngew ia ki jingsngew jong ngi bad ngim pat lah ban iathuh eiei sha ki lad pathai khubor ia mynta”.
Haba kylli halor ka jingbuh por ka Sorkar ban pynkynriah ia ki longiing na Them Metor hapoh ka 31 tarik mynta u Nailur, u Singh ula ong “U Symbud Myntri Rangbah ka Meghalaya ula aibor ha u Chief Secretary ban pynbeit ia ka kam. Ta ka daw ngi la wan iakynduh ia une u Khliehduh ki Ophisar ka Meghalaya ”.
