Shillong, Nailur 25 : Ka Sorkar Jylla kala rai ban pyntreikam noh da ka QR Code ha ki mar bapher bapher bala die da ka Tnad Excise ka Jylla ban tem ia ka jinglaitkai bad ban kyntiew ia ka jingpynmih khajna da 5 haduh 10 percent.
Haba iakren bad ki lad pathai khubor hadien ka jingialang ka Kynhun Myntri ha ka sngi Balang, u Myntri Rangbah Conrad K Sangma ula ong “Ngi la mynjur ia ka jingtyrwa ban buh noh da ki QR code ia ki mar bapher bapher bala die da ka Tnad Excise. Kane ka mut ba man ki bitor ki ban die ha Meghalaya kin don noh ia ki QR Code”.
“Kane ka iarap ia ngi ban buddien ia ka jingiaid jong ki bitor khnang ba ngin tip shano ki poi bad kaei ka dukan kaba dei ban die, bad lada don kano kano ka jinglait ei ka khajna ha kane ka rukom treikam” ula bynrap.
U Conrad ula ong “Ngi khmih lynti ba kane kan kyntiew hapdeng 5% haduh 10% ka jingpynmih khajna bad ka jingtem ia ki jinglait tuh ki khajna kiba don mynta ha ka rukom treikam, da kaba pyndonkam ia ka QR code”.
Haba kylli, u Conrad ula ong ba ka don ka jingkhmih lynti ba ka jingpynmih khajna jong ka Tnad Excise kan kiew da 5 haduh 10%.
“Kaei kaba ngi la leh ha ki snem bala leit noh, kila iarap ia ngi. Ta ka daw mynta ka jingpynmih khajna kala kiew haduh lai shah haba ianujor ia kaei kaba long ha u snem 2017. Ngi la kiew 3 shah ka jingpynmih khajna namar ki sienjan ba ngi la shim ha kine ki san snem bala leit noh. Ngi kyrmen ba kane ruh kan dei kawei ka sienjam ban peitthuh ia ka jinglaittuh ka khajna bad kan sa iarap ban nang kyntiew ia ka jingpynmih khajna” ong u Myntri Rangbah.
Nalor kane, u Conrad ula pyntip ruh ba ka Kynhun Myntri kala ai jingmynjur ia ka jingtyrwa ban ai noh da ka composite licence sha ki hotel.
Ula ong “Mynshuwa, ka licence la ai sha ki hotel haba pynshong nongrim na ki Restaurants lane ki Bar, kaba mut lada ka hotel ka don saw tylli ki bar lane saw tylli ki restaurant, kin hap ban shim haduh saw tylli ki licence. Mynta, ka jingthmu ka long ban ai noh kawei ka composite licence ia ka hotel baroh kawei, kaba mut ba kim donkam shuh ban aplai ia ki licence la la ka jong. Ka jingbuh bor kan long kaba kham heh haba ianujor bad ki licence jong ki bar”.
Ula pyntip ba kane ka dei ka amendment bala tyrwa da ka tnad Excise ia kaba la mynjur da ka Kynhun Myntri.
