Nongstoin, Nailur 21 : Ki 21 tylli ki Shnong ka West Khasi Hills, hynne ka sngi Saitjain, kila rai ban leit tur paidbah sha ka Ophis treikam ka Khasi Hills Autonomous District Council (KHADC) ha Shillong, lada kam sngap iaka jingpyrshah halor ka jingpynkynriah ia ki na Mawshynrut sha Rambrai-Jyrngam Constituency ha ka jingphiah pud thymmai ia ki Constituency daka Council.
Ia kane ka rai la shim da ka Joint Action Committee (JAC) ki 21 tylli ki Shnong kiba hap hapoh ki lai tylli ki Polling Station ka Mawshynrut-ka Misei, Mawsmai bad Langdongdai, na ka jingialang paidbah ba long ha ka shnong Nongmisei.
Ka JAC kala phah ruh ia ka kyrwoh kaba shai kdar sha u DyCEM ka KHADC bad Chairman ka Select Committee Bah PN Syiem ba lada ka Council kam pynphai biang ia ki 21 tylli ki shnong sha Mawshynrut bala rah ha ka jingphiah pud thymmai ia ki constituency, ki 21 shnong kin nang pynjur ia ka jingiakhih.
Lah ban kdew ba dang shen ha ka jingialang ba long ha Langdongdai, kine ki 21 tylli ki Shnong bala lamkhmat da ka JAC, kila rai ruh ban nym iashimbynta satia (boycott) ha ka elekshon MDC ka ba lah ban long ha u snem ban wan.
Ha ka jingialang ha Nongmisei, ki Sengbhalang bapher bapher jong ka thain kila wan ban ai jingkyrshan ia ka jingiakhih jong ki 21 tylli ki Shnong bad buh jingkylli ia u MDC bad MLA ka Mawshynrut halor ka jingsngap man man ia kane ka jingdawa kine ki Shnong.
Ki Sengbhalang kila kyrshan ia ka jingdawa ba dei ban pynhap biang noh ia kine ki 21 shnong sha Mawshynrut constituency.
Ki Nongkren ha ka jingialang, kila pyntip ba ka JAC kala dep ban phah da ka jingthoh haduh arsien arwat sha u Chairman ka Select Committee Bah PN Syiem ba pynpaw ia kane ka jingpyrshah bad ban pan por ban iakynduh hynrei la ong ba kim shym la ioh jubab satia.
Dei halor kane ka nongrim, ki paidbah na ki 21 Shnong kila rai ban shu leit tur paidbah noh dalade sha KHADC ban pynsngew ia ka jingpyr shah ia kane ka jingshah pynkynriah constituency.
