Shillong, Nailur 20: Ka Meghalaya Media Meet 2024 halor ka phang “Redefining Journalism in the Digital Age,” kaba dei ka jingialang ba nyngkong eh, la pynlong hynne ka sngi Thohdieng ha Taj Vivanta, Shillong, ha kaba la don lang u Myntri Rangbah ka Jylla u Conrad K Sangma bad ka Myntri ka tnad Information & Public Relations ka Dr Mazel Ampareen Lyngdoh.
Ha kane ka jingialang, la pynkup burom ruh ia ki 8 ngut ki nongthoh khubor kiba la ih bha ha ka kam, halor ka jingshakri bad jingaiti lut ka jongki ha ka kam thoh khubor.
Haba kren ha ka jingplie iaka jingialang, u Myntri Rangbah ula ong, ba ki dang bun ki kam kiba dei ban leh na ka bynta ban ai jingithuh ia u synniang uba la noh da ki nongpathai khubor.
“Kane ka dei kawei, kaba ngi kum ka sorkar ngi sngew ba ngi donkam ban pynlong ia ki prokram kum kane ban ai jingithuh bad ban pynkup burom ia ka jingtrei shitom ki nongpathai khubor, ban iakynduh bad ban iatai ia ka lynti kaba dei ban iaid shakhmat na ka bynta ka bha ka miat jong ki nongpathai khubor ban pynthikna ba ka kam kan nang kiew shaphrang bad seisoh da kaba bud ryntih ia ki kyndon bad kumjuh ban lah ban iaid katkum ka jingkylla jong ki kor teknoloji.
U Myntri Rangbah ka Jylla ula ong ba ka kam thoh khubor kam kut tang ha kaban shu thoh bad ka long kaba donkam ban pdiang ia ka jingkylla ka por bad ka jingkylla ki kor teknoloji bad ka jingdonkam ban pynthymmai ia ki bynta bapher bapher ha ka kam thoh khubor, ka jingioh jinghikai kaba man la ka por bad ki jingleit ialam kylleng ia ki nongthoh khubor.
U Myntri Rangbah ula ban jur ruh ia ka jingdonkam jong ka jingkynthoh kaba bha bad kaba tei ha ka synshar paidbah. Ula bynrap ba ha kane ka juk mynta namar ki kor teknoloji, ka long kaba donkam bha ban buh ia u pud hapdeng ki jingtip, ki jingpynsngew bad ki khubor.
“Mynta ia ka jingpynpaw ne ka jingtip la peit kum ka khubor bad ka long kaba kongsan ban don u lain jong ka jingpyniapher ia ki”, ula ong.
Nalor kane, u Myntri Rangbah ula pynpaw ruh ïa ka jingdonkam jong ka jingshaniah ha ki tnad pathai khubor.
“Ngi lah ban pynlong ïa kiei kiei kiba sngewtynnad tang shipor hynrei ban pynneh ïa ka jingshaniah ka dei kaba ngi baroh ngi dei ban ïaleh katba lah ban don iaka thong katba ngi nang ïaid shakhmat bad nga ngeit skhem ba ka jingshaniah kadei ka bynta kaba kongsan tam ha ka kam pathai khubor,” ula bynrap.
“Haba ngi nang iaid shakhmat, ngi khmih lynti ia ki jingkynthoh ki jong phi kiba tei bad ngin iatreilang na ka bynta ka bha ka miat jong ka imlang sahlang baroh kawei” ula ong.
Ula pynthikna ruh ia ki lad pathai khubor, ba ka sorkar kan sa peit bniah ia ki katto katne ki mat kiba iadei bad ka bha ka miat kiba la pynpaw da ki nongpathai khubor jong ka jylla.
Ka Katba ka Dr Ampareen Lyngdoh kala ong, “Ki lad pathai khubor ka phaikhmat sha ka sorkar na ka bynta kiba bun kiei kiei bad ngi la sdang mynta ka sngi ban iasnohkti bad ki lad pathai khubor bad ban peit ia ki lad ki lynti, ia kaba ngi lah ban pynbha ia ka jingim bad ka rukom treikam treijam bad ban ithuh ia ka jingtrei shitom jongki nongthoh khubor.”
Kala pynpaw ïa ka jingkmen ba kawei na ki phang ha ka Panel Discussion ha kaba iadei bad ki khubor thok bad ki jingtip kiba lamler, ka Myntri kala ong, “Nga ngeit ba ha kane ka jingiatai kaba mynta ka sngi, kan iatai sani bha na ka bynta ka lynti kaba bha tam ban shimkhia ia katei ka jingeh khamtam haba ha kine ki sngi kiba mynta kala don ka jingktah jong ka Social Media bad ka long ka mat kaba sngewkhia bha”.
Ka Myntri kala ong ruh, ba ki mat kum ka Ethical Responsibility, Mobile-Citizen Journalism bad Artificial Intelligence kidei kiba donkam ban iatai sani bha.
“Ka Ethical Responsibility ne jingkitkhlieh kaba don akor kadei kaei kaei kaba long palat ia kano kano ka kyndon jong ka riti synshar bad ngi hap ban pynthikna ba ki nongthoh khubor kiba dang samla ha ka kam, kin iahap ban iaid katkum ka rukom treikam kaba don ia ka jingkitkhlieh, khnang ba ngin lah ban don ia ki lad pathai khubor kiba lah ban pdiang bad ki bym ai ka jingbishar iano iano”, kala ong.
Hashwa kane, ki heh sorkar kila pynkup burom ia ki 8 ngut ki nongthoh khubor kiba la ih bha ha ka kam, na ka bynta ka jingshakri bad jingaiti lut ka jongki ha ka kam thoh khubor.
Ki nongthoh khubor kiba la shah pynkup burom ki kynthup ia u Bah P Marwein, Editor jongka Youth Today, u Subroto Bhattacharjee u Bureau Chief ka UNI, Bah R.M Shabong, u Editor jong U Rupang, Bah MM Thaiang, Editor jong U Yutip, u Manas Choudhury, Editor barim jong ka Shillong Times, u Sanat Chakraborty, u Independent Journalist, ka Linda Chhakchhuak, ka Independent Journalist, bad u Sanjib Bhattacharjee, u nongshongdur jongka Shillong Times.
U Myntri Rangbah ula pynbna ruh ha ka jingialang ba yn ia ka pisa kaba T.1 Lak na ka CMSG ia kitei ki 8 ngut ki nongthoh khubor kiba lashah pynkup burom.
Hadien kane la pynlong ruh ia ka Panel Discussion ha kaba ki riewshemphang kila iatai halor ka mat “Navigating the Evolving Media Landscape: Challenges, advantages & Future”, “Press Laws & Ethics”, “Welfare Schemes for Journalists under Government of India” bad “Visual Content Verification”.
Ha kane ka jingialang la wan ban iashimbynta da ki nongthoh bad ki nongpathai na kylleng ki district jong ka jylla Meghalaya nalor u Commissioner & Secretary ka tnad I&PR u Vijay Mantri bad u Director ka tnad I&PR u Malthus Sangma lem bad kiwei kiwei.
