Nongstoin, Nailur 12 : Ka Ophis jong ka Khasi Students Union (KSU), West Khasi Hills, kala shah prong jubor ha ki nong tuh kiba la rong ia bun tylli ki tiar electronics kiba don ha kane ka Ophis.
Ia kane ka kam la lap da uwei u dkhot ka KSU Wanbhakupar L Nonglait ba na Tiehsaw, Nongstoin ha ka 11 tarik Nailur.
Kat kum ka khubor Pulit, u Wanbhakupar ula leit sha ka Ophis ka KSU kaba don ha New Nongstoin, ha ka por 6 baje janmiet bad lap ba ka jingkhang jong ka Ophis, kala shah kyndang bad plie rynghang.
La ong ba ynda ula rung hapoh, ula lap ba kawei ka TV Sony, Inverter Battery, Mobile Phone bad ka Set Top Box nalor ka receipt bad warranty card jong ka TV, kila shah tuh. Mar mar khlem da pynslem, ula leit ban buh da ka ejahar sha ki Pulit ka Nongstoin Police Station.
Ki Pulit kila hiar ban tohkit ia kane ka jingjia bad da ka jingiarap lem jong une u Nongmudui bad ki Dkhot ka seng, ki Pulit kila ioh ban kem ia 3 ngut ki briew kiba suba donkti ha kane ka kam tuh.
Kine ki laingut ki kyrteng u Lamboklang Puwein, u Khrawkupar Nongsiej bad u Stonedingwell Marngar.
Ki Pulit kila ioh ruh ban kurup noh ia kine ki tiar tuh na Siejlieh, bala buhrieh ha ka iing jong uwei na kine ki briew ba shah kem. Ia kine ki briew la ialam tian bishar hakhmat ka Iingkashari bad la thep ia ki hapoh ka Judicial custody.
